Árran julevsáme guovdásj
Åse M.P. Pulk, Sámediggi
Sámedikkeráde Maja Kristine Jåma, Hábmera suohkana suohkanoajvve Britt Kristoffersen Løksa ja Nordlánda fylkkaráde jådediddje Svein Øien Eggesvik li viek dudálattja gå sjiehtadam li gudi galggi æjgádin ja gåktu njuolgadusá galggi, guhkep målssoma maŋŋela vuododusás oasosvidnudahkaj.
Árran la viek ájnas sáme institusjåvnnå mij guosská julevsáme kultuvrav, gielav ja sebrudagáv sihkarastátjit, åvddånahtátjit ja joarkátjit. Danen li dá gålmmå almulasj æjgáda ávon gå dáv aktan dahki, ja siján li vuorddemusá aktisasjbargguj åvddålijguovlluj váj institusjåvnnå oadtju dågålasj dåjmav ja vejulasjvuodajt åvddånahttet.
Maja Kristine Jåma
Árvu/Sametinget
– Ávon lav gå Árrana boahtteájgge sihkarasteduvvá gå danna l nav guovdásj roalla ielle bájkálasj sebrudagáj ja barggosajij hábbmidijn, máhto juohkemin ja gaskostimen ja giellaåvddånimen, aktan sáme kultuvrraárbe háldadimen, javllá sámedikkeráde Maja Kristine Jåma.
– Árran la akta suohkana åvdemus sebrudakakterajs, nasjåvnålasj rållajn ja máhtudagájn. Hábmera suohkanij le dát viek ájnas kultuvrrainstitusjåvnnå massta lip viek mihá, ja ávon lip gå dálla dav ådå vidnudakhámen joarkedip, javllá Hábmera suohkana suohkanoajvve Britt Kristoffersen Løksa.
– Nordlánda fylkkasuohkan galggá sebrudagájt åvddånahttet. Dán aktijvuodan la Árrana barggo julevsáme giela, kultuvra ja sebrudagá åvdedimen viek ájnas. Danen lav viek ávon gå dálla l tjielggam gåktu Árran galggá doajmmat boahtteájggáj, javllá Nordlánda fylkkaráde jådediddje Svein Øien Eggesvik.
Vidnudagá ulmme l Árranav æjgádit ja dåjmadit nasjåvnålasj sáme institusjåvnnån váj navti julevsáme kultuvrav, gielav ja sebrudakiellemav nanni, åvddånahttá ja joarket. Dåjmastis galggá institusjåvnnå arvusmahtte birrasav stimulerit ja åvddånahttet bájkálasj sáme árvoj ja dábij milta, madi ristagis kultuvrraárbev vielet. Institusjåvnnå galggá buktet sámegiellaj guládallat. Vidnudahka ulmmáj ij gullu oasástallam.
Vidnudagá oasosruhta l kr. 2 000 000,- juogeduvvam 2 000 åssusijda, guhtik kr. 1 000,-.
| Æjgát | Oasse | Galla åssusa | Árvvo |
| Sámedigge | 49 % | 980 | 980000 |
| Hábmera suohkan | 34 % | 680 | 680000 |
| Nordlánda fylkkasuohkan | 17 % | 340 | 340000 |
Gudi li stivran
Stivra jådediddje Amund Eriksen (Sámedigge)
Stivrraájras Anne Britt Klemetsen Hætta (Sámedigge)
Stivrraájras Sten Hilling (Hábmera suohkan)
Stivrraájras Linda Jessen (Hábmera suohkan)
Stivrraájras Rolf Steffensen (Nordlánda fylkkasuohkan)