Sámedikkeráde la ávon gå máhtti vaddet dårjav julev- ja oarjjelsámegiela girjálasjvuoda prosjevtajda ma tjalmostahtti mánájt ja nuorajt.

Julevsáme almmudahka Nálaga tjállaga la oadtjum 330 750 kr buvtadittjat ja almodittjat mánájgirjev “Njoammel ja gidádálvve” tjálles Rakel-Iren Pedersenis, Girjje la tjáleduvvam julevsáme iednegielagijda 3-5 jagágijda. Girjje tjuorgge la Sissel Horndal. 

– Dárbbo la iemegirjálasjvuohtaj tjáleduvvam julevsámegiellaj, aj mij guosská mánájgirjijda ma tjalmosti mánájt gænna la julevsámegiella iednegiellan. Mån la ávon gå máhtáv doarjjot jur dáv, javllá sámedikkeráde Maja Kristine Jåmå. 

Duodden la julevsáme almmudahka Tjihkkom Almmudahka oadtjum 176 000 kr jårggålittjat girjev “Himlabrand” svierigadárogielas julevsámegiellaj. “Himlabrand” almoduváj jagen 2021 ja la tjáleduvvam svierigadárogiellaj julevsáme tjálles Moa Backe Åstotis julevsáme giellaguovlos svieriga bielen. Åstota duogásj la boahttsuæládus. 

Romána ulmmejuogos la nuorra ållessjattuga, la nuora Ánte birra gut gullu boahttsuæládusfamiljaj Jåhkåmåhken. Sunji la diehttelis gå sån la ájnna máná, jut galggá joarkedit árbbedábijt ja barggat boahttsuj. Hæhkkat juojddá ietjá gæsá suv, mij tjuovvop oajvvepersåvnåv gájkka suv hásstalusájn. 

– Buorre gå jårggåluvvám girjje mij la tjáleduvvam julevsáme boahttsuæládusá ja kultuvrajn duogátjijn. Dát la riek ájnas tiebmá tjalmostahttet, sierraláhkáj nuorajda, javllá Jåma.

Duodden la Trööndelagen fylhkengærjagåetie:j juolloduvvam 120 000 kråvnå lågådittjat videogirjijt oarjjelsámemánájda oarjjelsámegiellaj. 

– Trööndelagen fylhkengærjagåetie ja Gïelem nastedh li aktisattjat barggam ja buvtadam oarjjelsáme videogirjijt ja jiednagirjijt, dárbbodiedoj milta mij guosská sáme girjálasjvuohtaj ja giellaj. Videogirje li læhkám riek gatjáduvvam sihke nuoraj ja ållessjattugij gaskan. Dajnas li videogirje ájnas ressurssa giellaoahppamin, duodden åvddånahteduvvá oarjjelsámegiella, javllá sámedikkeráde Maja Kristine Jåmå.