Dán jage lidjin sierralágásj ållo nuorra åhttse goappásj stipendajda. 29 nuora lidjin valástallamstipendav åhtsåm, 20 næjtso ja aktse báhtja. 14 nuora lidjin kultuvrrastipendav åhtsåm, 10 næjtso ja niellja báhtja. Sámedikke kultuvrra- ja valástallamstipænnda nuorajda galggá måvtåstuhttet nuorajt ratjátjit musihka, kultuvra ja valástallamsuorgij.
– La geldulasj vuojnnet man alla dásse dán jagásj kandidáhtajn la. Sij li vuosedam duodaj rahtji ietjasa kultuvrra- ja valástallamsuorgijn, ja li buorre åvddågåvå ietjá sáme nuorajda, javllá sámedikkeráde Maja Kristine Jåma (NSR).
Sámedikkeráde juollot valástallamstipendav Jonna Johanne Dunfjeld-Mølnvikaj ja Ina Marielle Trane Porsangerij, ja kultuvrrastipænnda juolloduvvá Leander Andersen Gilsåmoj ja Iris Storelv-Rabonenij.
– Divna nieljes li buorre ambassadera nuorra kultuvrra- ja valástallamberustiddjijda. Ávvudaláv vuojnátjit ienep dájs nuorajs åvddålijguovlluj ja sávav sidjij gájk vuorbev vijddásabbo, javllá Jåma.
Oanegis presentasjåvnnå dajs nielje nuorajs gudi stipendav oadtju Sámedikkes:
- Jonna Johanna Dunfjeld-Mølnvik, 20 jage vuoras Snoasas. Jonna Johanna la volleybállospællár talænnta. Sån la aktan ietjas juohkusijn, Liernes Volleyball, spellam 1. divisjåvnå moadda gávda ja dá jage sij vuojttin seriav. Jonna Johanne juogos la gárves spellat bajedibmáj. Duodden valástallamij, de la Jonna duodalasj oarjjelsámegiella adnema hárráj. Dav sån dahká sihke nanna ja ålggolin bána. Jonnan la vissjalis ja måvtåstuhtte nuorra sáme valástalle.
- Ine Marielle Trane Porsanger, 20 jage vuoras Vuonnabadás Unjárgan. Ine Marielle l aktijvva låssodislåggŋididdje. Sån la 2022:n nahkam guokta Vuodnarekårda biedjat gievrrudaklåggŋidimen. Sån besaj Vuona rijkkajuohkusij tjavtjan 2022, ja duodaj rahtjá ietjas valástallamsuorgen, ja la ietjas tjehpudagájn válldám VM-gájbbádusájt ietjas klásan. Ine l måvtåstuhtte nuorra låssodislåggŋididdje, gænna li ambisjåvnå jåvsåtjit guhkás.
- Leander Andersen Gilsåmo, 16 jage vuoras Roandemis. Leander la barggam siednadájddárijn dat rájes gå lij 11 jage vuoras. Sån la aktijva teáhtarjuohkusin Bul i Nidaros ja la sæbrram stuora teáhtardagádimijn ja la juo buorre árvustallamijt oadtjum daj iesjguhtik roallajs maj la oavdástallam teáhtarsienan. Sån galggá dálla liehket bagádallen nuoramus teáhtarjuohkusijn Bul:an, ja galggá aj barggat sáme nuoraj.
- Iris Storelv-Rabone, 17 jage vuoras Evenásjes. Iris la barggam gåvvådájdajn mánnávuoda rájes. Sån la juo vuosedam sujna li dájddárvaddása ja la dán jagásj teáhtarplakáhtav hábbmim sáme festivállaj Márkomeannu. Irisin li læhkám moadda vuosádusá Sámen ja dijmmá lij sujna sierra vuosádus Márkomeannun. Vájku sån la nuorra, de la juo sjaddam dåbdos sáme vuosteldimdájddár. Sån biedjá fámojt ietjas dájddár åvddånibmáj, oahppat iesjguhtik lágasj vuogijt baktu ma gåvvådájdan li.
Gatjálvisá jali ságájdahttem, guládalá sámedikkeráde Maja Kristine Jåma (NSR), tlf. +47 47242366, maja.kristine.jama@samediggi.no
Åvdep vuojtte:
2021:
Valástallamstipænnda: Anders Inga ja Stine Lise Nordsletta Somby
Kultuvrrastipænnda: Jon Mika Nystad Eskonsipo ja Marit Julianne Gaup
2020:
Valástallamstipænnda: Amalie Storelv ja Olivia Braastad
Kultuvrrastipænnda: Peder Niilas Tårnesvik, Emil Nikolaus Karlsen ja Lávre Johan Eira
2019:
Valástallamstipænnda: Amalie Kristine Triumf, Peder Funderud Skogvang ja Tuva Sirihin Schall Mikkelsen
Kultuvrrastipænnda: Ánna-Katri Helander
2018:
Valástallamstipænnda: Benedicte Guttorm ja Sajane Karina Olsen
Kultuvrrastipænnda: Anna Kaisa Partapuoli ja Johan Daniel Turi
2016:
Valástallamstipænnda: Rakel Birkeli ja Jan Arthur Reinås
Kultuvrrastipænnda: Anna Linea Fjellheim Varsi ja Ella Marie Hætta Isaksen