2021’n tjadádij professåvrrå Jon Todal guoradallamijt Vuona bielen Sámedikke åvdås bidumsámegiela ja ubbmemsámegiela birra, ja sån la tjállám tjielggidusájt dálásj gielladilij birra ja boahtteájge dåjmaj birra. Tjielggidusájn dættoduvvá aktisasjbarggo bihtámsáme ja ubbmemsáme birrasij Svieriga bielen la dárbulasj.

Mikkel Eskil Mikkelsen Åse M. P. Pulk, Sámediggi

– Tjielggidusá li buorep vuodov vaddám Sámediggáj máhttelisvuodajt árvustallat gåktu ælládahttet dájt gielajt. Da li aj åbbålasj gåvåv vaddám makkir máhttelisvuoda li barggat vijddásappot gielaj ælládahttemijn Vuonan, javllá Mikkelsen.

Tjielggidusá vuosedi dáj gielaj dile Vuona bielen li viehka sæmmilágátja. Garra dárojduhttempolitihkka l vájkkudam Vuona bielen ælla bihtámsáme ja ubbmemsáme giellaaddne gejn la læhkám sámegiella sijddagiellan mánnávuodan. Dájn guovlojn li huoman ulmutja gudi berajvuoda ja kultuvralasj tjadnusij baktu identifisieriji ietjasa bihtámsáme ja ubbmemsáme gielajn ja kultuvrraárbbedábijn. Giela li ájn anon Svieriga bielen ja ulmutja Svieriga bielen háldadi bihtámsámegielav ja ubbmemsámegiela iesjguhtik dásijn. Gielajn la huoman duodalasj dille ja goappásj giela li sælldásit ájteduvvam giela.

Sámedigge l álmmuktjåhkanimijt ásadam bihtámsáme ja ubbmemsáme guovlojn, berustime låpptima ja oattjotjit diedojt sihke gielladilijn, ja avtabuohta oadtjop diedojt giellabirrasijn sihke Vuona ja Svieriga bielen makkir dárbo ja vuorddemusá siján li ælládahttembargguj. Bådij åvddån jut la berustibme válldet ruopptot ja gielajt várjjalit.

Sámedikkeráde vállji aktisasj ållestjåhkanimássjev åvdedit bihtámsáme- ja ubbmemsámegiela ælládahttema birra Vuonan. Mærrádusárvvalus la guovten oasen, akta bidumsámegiellaj ja nubbe ubbmemsámegiellaj. Sámedikkeráde ævtot Sámedigge dåhkkit sihke bihtámsámev ja ubbmemsámegielav sámegiellan Vuonan.

– Sihtap vájkkudit jut hiebaduvvá dille nav vaj máhtti dagáduvvat aktijva bihtámsáme ja ubbmemsámegiellabirrasa Vuona bielen, ja dan vuossti barggap jut ásaduvvá rájájrasstididdje aktisasjbarggo, javllá Mikkelsen. Sámedikkeráde dan diehti árvval sierra vuorodimijt dahkat budsjæhttaj ælládahttemij ja nannitjit dajt gielajt.

Sámedikkeráde árvval aj dan vuossti barggat vaj dajt guokta gielajt oadtjot bájkkenammalága njuolgadustjállagij, vaj ienep bihtámsáme ja ubbmemsáme bájkkenamá máhtti guovdásj bájkkenammaregisstarij registrieriduvvat vaj da máhtti almulattjat aneduvvat.

Ássje giehtadaláduvvá ållestjåhkanimen snjuktjamáno 8. biejve. Lågå ássjepáhppárijt: Ássje 08/23 Bidumsámegiela ja ubbmemsámegiela ælládahttem Vuonan

Ságajdahttema jali gatjálvisá, guládalá sámedikkerádijn Mikkel Eskil Mikkelsenijn (NSR), tlf. +47 917 42 161, mikkel.eskil.mikkelsen@samediggi.no