NA Technologies AS la app:av dahkam mij sámegiela åhpadusáv fállá moatten dásen. App:an dagáduvvá virtuella sámegielak ariená gånnå giela praktisieriduvvi gasskasasj aktisasjbargo baktu. App:a dálla gávnnu Vuonan tjuovvovasj gudá sámegielak variántajn: oarjjelsámegiella-dárogiella, nuorttasámegiella-dárogiella, julevsámegiella-dárogiella, lullesámegiella-dárogiella, bidumsámegiella-dárogiella ja nuorttasámegiella-oarjjelsámegiella.
Nannitjit aktijvuodav ja dádjadusáv sáme guovlojn la åvdeduvvam sávadus jut galgaluluj aj dagáduvvat julevsámegiella-nuorttasámegiella versjåvnnå. Dat luluj dahkat máhttelissan dáj sámegielaj ságastiddjijda gielav oahppat njuolgga nubbe nuppes, nav vaj ij dárbaha dárogiela baktu oahppat. App:a ulmmejuogos li gájka badjel 13 jage gudi sihti julevsámegielav ja nuorttasámegielav oahppat nubbe nuppes.
Sámedikkeráde l dálla dårjav vaddám New Amigos julevsámegiella-nuorttasámegiella app:aj.
– Mánájn ja nuorajn la dárbbo sáme gielajt adnet asstoájgen. New Amigos app:a l digitála æjvvalimsadje mij la ájnas sosiála, kultuvralasj ja sámegielak aktivitiehta måvtåstuhttemij, javllá sámedikkeráde Mikkel Eskil Mikkelsen (NSR)
Danen gå New Amigos ietjastis la suohtas spælla, de ájggu aj dættodit jåksåt sijáv gudi dálla e åvvånis árvustalá ietjá sámegielajt oahppagoahtet. App:a galggá dájt juohkusijt jåksåt, nannit sijá motivasjåvnåv ságastittjat sámegielav, ja nannit sáme identitiehttadåbdov.
App:a galggá gárves ådåjakmáno 2024, ja galggá gávnnut App Store:an ja Google Play:an.
300 000 kråvnnåsasj doarjja vatteduvvá doarjjaårdniga doarjja giellaåvddånahttemdåjmajda baktu.
Ságájdahttemav jali gatjálvisá, guládalá sámedikkerádijn Mikkel Eskil Mikkelsen (NSR), tel. +47 917 42 161, mikkel.eskil.mikkelsen@samediggi.no