Ájgegávdan gålgådismáno 27. b.- javllamáno 22. b. dán jage vuoset Tegnerforbundet vuostasj retrospektjva vuosádusáv sáme dájddárijn Ánddir Ivvár Ivvárijn, Iver Jåksajn, Oslon. Vuosádus dættot Jåksa tjuorggamijt ma ælla åvddål vuoseduvvam almulattjat. Gålmmå sáme dájddárav Laila Labba, Niillas Helander ja Kurt Hermansen vájkkudi vuosádussaj ådå buktagij ma Jåksa dájdalasjvuodajn guládalli.

Dájna dagujn sihtá Tegnerforbudet Iver Jåksav tjadnat dálásjájgedájddaj. Iver Jåks la åvdemusát dåbdos suv grafihkajn, suv tjuollamij ja installasjåvnåj, valla ábnnasij gaskan majt Jåks guodij lidjin ållo tjuorggama. Dá tjuorggama vuosedi Jåksa bargo gåbddudagáv aj.

– Dát vuosádus sæbrrá låpptitjit Iver Jåksav ietjá perspektijvvaj, sæmmi bále åvddån buktá moadda nuorra sáme dájddára sæmmi prosjevtan, juoga man lijkkuv huj buoragit doarjjot, javllá Maja Kristine Jåma (NSR).

Hanne Hammer Stien ja Kristoffer Dolmen libá kuráhttura vuosádusán ja barggaba aktan moaddásij vuosádusá gaskostimbargon. Duola dagu galggá liehket fáhkaseminára Arkitekturmusiejan, Oslo Sámiid Duodji dålá duodjeiehkedijt Tegnerforbudan, ja Laila Labba ja Marte Lill Somby galggaba gaskostimprosjevtav dålat mánájda ja nuorajda Tegnerforbudan. Duodden dasi la gaskostimsjiehtadus dagáduvvam Oslo sáme skåvlåjn vuosádusájgegávdan.

– La buorre buojkulvis tjuovvolibmáj gåktu Tegnerforbudet tjadná allasis ietjá sáme organisasjåvnåjt ja institusjåvnåjt ja aktisattjat barggá jåvsåtjit sáme dájdajn nav moaddásij gå máhttelis, javllá Jåma.

200 000 kråvnnåsasj doarjja l juolloduvvam doarjjaårdnigin Kultuvrradåjma baktu.

Gatjálvisá jali ságájdahttem, guládalá sámedikkerádijn Maja Kristine Jåma (NSR), mob +47 984 87 576, maja.kristine.jåma@samediggi.no