Prosjækta la aktisasjbarggo Tjihkkom almmudagá ja Duaddara ráfe – bidumsáme giella- ja kultuvvraguovdátja gaskan.  

Prosjevta ulmme la álgon buktet Qvigstada báhkolistajt julev- ja bidumsámegiellaguovlojs almulasjvuohtaj ja addnuj. Qvigstada giehtatjáledum notáhta ja giellagæhttjalime galggi transkriberiduvvat ja analyseriduvvat, ja tjáleduvvat udnásj ortografijja milta ja almodit báhkolistajt elektråvnålattjat. Prosjækta galggá aj duodastit udnásj bæjvváj duodastahtek bágojt ja moallánagájt. Báhkolissta galggá aj vuojnnusij buktet dialæktaærádusájt ja giellarievddamijt.  

– Åvddånahtátjit ja nannitjit sierraláhkáj julevsáme- ja bidumsámegielav, la ájnas jut gávnnu tjálalasj gáldo masta sebrudahka máhttá ávkkit bargon, javllá sámedikkeráde Mikkel Eskil Mikkelsen (NSR). 

Sámedikkeráde la ávvon gå bessi doarjjat prosjevtav, gå la stuor dárbbo buktet julevsáme- ja bidumsámegiela bágojt ja moallánagájt addnuj.  

–Transkriberit oabme bágo ja moallánagá la sierraláhkáj ájnas bidumsámegiellaj gå uddni i vargga gávnnu tjálalasj gáldo bidumsámegiellaj. Báhkogirje ma almoduvvi almulattjat la ájnas barggo nannitjit sáme gielajt ma li ájteduvvam, javllá sámedikkeráde Mikkelsen.  

Doarjja 134 000 kråvnnåj vatteduvvá doarjjaårdniga Duodastimdåjmaj baktu.