Tjihkkom Almmudahka oadtju 111 000 kråvnnåsasj dårja jårggålittjat "Diary of A. Wimpy Kid" julevsámegiellaj. Girjjerájddo l mihtos girjjerájddo 10-15 jahkásasj mánájda, mij la jårggåluvvam moatte gielajda dallutjis gå vuostasj almoduváj ieŋŋilsgiellaj jagen 2007.
Girjjerájddo l Greg Heffley birra, suv rádnaj ja æjgádij birra. Grega niehko la sjaddat mihttusin. Girjjerájddo tjuovvu suv mánnávuoda dallutjij gå jåkså pubertiehtaájggáj ja fiesstim, tjásmagisá, næjtso ja vuosteldibme la guovdátjin.
– Tjihkkom Almmudahka la maŋemus jagij ájnnasit jårggålam ja girjijt almodam julevsámegiellaj. Tiebmá dán girjen guosská riek ållo nuorajda dan álldarin, berustahtek gånnå væráldin sij li, danen la buorre gå dálla sjaddá ienep girjálasjvuohta giedaj gaskaj nuorajda julevsámegiellaj, javllá sámedikkeráde Maja Kristine Jåma (NSR).
Trøndelága fylkkasuohkan oadtju 570 000 kråvnå gáktsa girjje jårggålimijda, ja lågev videogirjje jårggålimijda. Trøndelága fylkkasuohkan, aktan fylkagirjjevuorkájn prosjæktajådediddjen, la moatte jagijt girjijt jårggålam oarjjelsámegiellaj, ja aj bidumsámegiellaj ja ubbmemsámegiellaj. Duodden dasi li maŋemus jagijt videogirjijt ja jiednagirjijt buvtadam æjgádijda ja iehtjádijda sávadusá milta gudi li dárbojt buktám sijá sáme girjálasjvuoda ja giella hárráj.
– Trøndelága fylkagirjjevuorká barggo jårggålit mánáj- ja nuorajgirjijt oarjjelsámegiellaj la læhkám ájbas dárbulasj dan gáktuj jut oadtjop ienep girjálasjvuodav oarjjelsámegiellaj. Giellaåvddånahttemij la ájnas jut girjálasjvuohta gávnnu. Videogirje ma maŋemus jagijt li dagáduvvam, li læhkám riek populerra sihke nuoraj ja ållessjattugij gaskan giellaåhpadusá gáktuj, javllá Jåma.
Sámedikkeráde l aj juollodam 34 000 kråvnå doarjjan Vinterleik almmudahkaj Niilasa ja Magga gåvvårájdov jårggålit nuorttasámegiellaj. Åvddål la almoduvvam gåvvårájddo gånnå Niilas ja Magga sæbrraba dárogiellaj, nuorttasámegiellaj ja guojnagiellaj. Gåvvårájddo l læhkám populerra mánáj gaskan, ja la buoragit bigoduvvam vuobddemvejulattjan. La aj boahtám teáhtarversjåvnnå vuostasj almodimes mij vuoseduvvá mánnusattjat Kultuvralasj skåvllåvuossan, ja gatjálvis ienep subttsasijda Niilasa ja Magga birra la lassánam dan maŋŋel.
– La stuora dárbbo jut mánájda ja nuorajda båhti dakkár almodime ja gåvvårájdo ma li álkke dádjadit, danen la buorre gå máhttep dårjav vaddet dákkár buorre prosjevtajda.
Sámedikkeráde vil juollot 77 440 kråvnå doarjjan Fremstad Paraply vidnudahkaj nuorttasámegielak mánájgirje "Få vekk dan musa" jårggålibmáj. Girjje almoduvvá aj E-girjjen.
– Gå girjje, mij galggá nuorttasámegiellaj jårggåluvvat, aj boahtá E-girjjen, la riek ávvudahtte, gå li nav binná E-girje sámegiellaj, javllá Jåma.
Dårja tjoahkkáj 792 440 kråvnnåj juolloduvvá doarjjaårdnigis Doarjja sáme girjálasjvuoda prosjæktadoarjjaj, gånnå l rabás åhtsåmájggemierre javllamáno 1. biejve rádjáj. Doarjjaårdniga ulmme l sáme girjálasjvuohta mij la sadjihin sámegiellaj.