Mærrádus la sámedikkeráde árvvalusá milta.

Kent Valio virgáduvvá Sámedikke direkterran ájgegávdan 01.11.2026-31.10.2032 ja suv oajvvebarggobájkke l Sámedikke háldadus Kárásjjågån.

Sámedikkepresidænnta Silje Karine Muotka l dudálasj virgádimijn.

Silje Karine Muotka Árvu/Sámediggi

​– Sujna l nanos jådediddjeduogásj almulasj ja politihkalattjat stivrriduvvam ásadusájs, ja dåbddå buoragit sáme sebrudagáv. Dat vaddá buorre vuodov jådedittjat háldadusáv gånnå l alla máhtudahka ja stuora ratjástibme mijá sebrudakdåjma hárráj. Direkterra galggá ålles Sámedikke åvdås barggat ja dilev hiebadit nav vaj álmmukválljiduvvam ájrrasij mærrádusá tjuovvoluvvi, javllá Muotka.

Gietjav ulmutja åhtsin Sámedikke direkterravirgev gå åhtsåmájggemierre någåj bårggemáno 3. b. 2026. Åvdep direkterra Inger Marit Eira-Åhrén lij virgen avta ájgegávdav, ragátmáno 1. b. 2020 rájes, bårggemáno 31. b. 2026 rádjáj.

Ávon luohtádusá åvdås  

Kent Valio Åse M.P. Pulk/Sámediggi

– Anáv árvvon gå dáv virgev oadtjuv, ja ávvudaláv viehkken ietjá barggij Sámedikken, barggat ámmádijn ålles politihkalasj dásev. Álgadav dán jådediddjebargov vuollegisvuodajn sámediggebarggij máhtudahkaj ja vieledusájn álmmukválljidum ájrrasij ájnas dåjma hárráj sáme álmmuga åvdås. Muv vuostasj barggon viertti liehket åttjudit gåvåv divna politihkalasj diŋŋgomijs ja gulldalit barggij tsuojggidusájt, javllá Kent Valio.

Rekruttierimvidnudahka Heia Nord-Norge l viehkedam Sámedikke vuodulasj rekruttierimprosessa baktu. Bargguj gulluj kandidáhttaåhtsåm, válljiv, moadda ságájdahttemvuoro, kandidáhtaj guoradallama ja vijdes referánssaguoradallama. Sámedikke oajvveluohtádusulmutja li aj prosessav tjuovvum. Låhpalasj árvustallamin la ráde dættodam kandidáhta formála máhtudagáv, jådedimåtsådallamav, persåvnålasj vuogijt ja referánsajt.

Moattebelak duogásj 

Kent Valio boahtá Guovddagæjnos, ja bargos Sáme allaskåvlå riektura seniorrádevadden. Valion la barggovásádus journalisstan ja jådediddjen NRK:an måttijt jagij nalluj ja iesjguhtiklágásj virgijn. 

Valio lij suohkandirekterra, ja nav bajemus jådediddjen Guovddagæjno suohkanin ájgegávdan 2015-2023. Sujna l nanos máhtudahka sáme gielan ja kultuvran, ja sån buoragit dåbddå politihkalasj duobddágav Sámen.

Fáktádiedo Kent Valioa birra:  

• 54 jahkásasj, Guovddagæjnos. 
• Åvdep suohkandirekterra Guovddagæjnon (2015-2023) 
• Mastergráda jådedimen Handelshøyskolen BI ja cand.mag. sebrudakfágan Bådådjo allaskåvlån 
• Moattebelak jådediddjeduogásj NRK:an
• Nuorttasámegiella iednegiellan

Le duola degu barggam iesjrádálattjat æládusáj, rijkajgasskasasj koordináhtturin Internasjåvnålasj Sáme Filmmainstituhtan ja Sáme allaskåvlå riektura seniorrádevadden.