Æládus- ja guolástusdepartemænnta la rádjam barggojugosrappårtåv rabás juohkusa birra ja dan duodde guollimmiere merrasábmelasj duobddágijda guolástussaj. Sámedikkeráde mielas la åvddånahttem maŋemus jagijt vájkkut jut udnásj mierre 3000 toanna játtis ij la dågålasj dasti.

– Mij lip vuojnnám stuorra lasádusáv oassálasstemin, birrusin 460 vantsajs jagen 2022 gitta badjel tuvsán vantsa jagen 2025. Dat ietjastis la ávvudahtte, valla gå guollimmierre juohkka guollárij la vuollánam gávtse tånnas gålmmå toannaj le dat alvos. Udnásj jåhto ij la duodaj nuoges vaj ulmutja máhtti viessot guolástusás. Vásstádus ij la ålgodit merragátteguollárijt, valla jut stáhtta jådet ienep jáddiv årdnigij, javllá sámedikkeráde Jon-Christer Mudenia (NSR). 

Rája hæhttu liehket vuododuvvam sáme adnodábijda

Sámedikkeráde tjuottjot jut geografijjalasj rájá guolástusmærrádusårdnigij hæhttu vuododuvvat duodaj sáme adno- ja årromdábij milta, ja guolástusá merkadusá milta bájkkesebrudahkaj ja kultuvrraj.

– Guollimriektá ij galga liehket tjanádum giellaválljimij jali æládusåvddånahttema doarjjaguovlojda. Guovllo máhttá liehket ienep aktiduvvam sihkarastátjit dásálasj ævtojt aktisasj guollimhámnajn, valla sáme ulmme ij máhte gáhtot, ja da gudi uddni li årdniga sisbielen e galga ålgoduvvat, tjielggi Mudenia. 

Ráde várrot aj vuossti jut ådå gájbbádusá årromájggáj jali guollimájggáj galggá dahkat dav gássjel nuorajda rekruttieriduvvat, jali vájkkudit dajda gudi adni tjoahkkeæládusáv guolástusájn ja duola dagu ednambargguj. Tjoahkkeæládus la buolvas buolvvaj læhkám vuodo merrasámesebrudagán. 

Ådå namma viertti tjalmostahttet riektávuodov

Guovdásj gájbbádus Sámedikkerádes la rievddat årdniga namáv udnásj merragátte guolástusårdnigis” “sáme guolástusriektá guollimmærráj” 

–Gå gåhttjop dav sáme guolástusriektá guollimmierre vuosedip tjielggasit jut årdnik vuododuvvá riektá- ja kultuvrravuodo nanna. Årdnik galggá guoskadit gájk kvalifiseridum guollárijt guovlon váni gehtjak ietjaska duogátjij, valla namma vuoset dan årdniga duodaj vuodov, javllá Mudenia.

Gájbbet tjuovvolimev riektátjielggidussaj ja láhkamærrádusájt

Sámedikkeráde dættot jut jahkásasj guollimmierre doajmma rabás juohkusin la dåssju oasse ulmme ja ij la åbbålasj dievddem merasámij guollimriektájs. 

– Udnásj årdnik la dárbulasj ja positijva doajmma árggabiejven, valla ij la låhpalasj. Sámedikkeráde sjaddá joarkket gájbbet jut stáhtta kártti merrasámeanov aj ålggolin Finnmárko, ja jut merrasámij guolástusriektá maŋutjissaj sjaddi formalalattjat láhkamierredum álmmukriektá buohta, låhpat sámedikkeráde Jon-Christer Mudenia.

Ássje galggá giehtadaláduvvat Sámedikke ållestjåhkanimen duorastagá ragátmáno 24. biejve.