Davvi Girji AS ájggu ådåsis Egil Utsi’a girjev prienntit “Medisinsk lommeparlør: norsk-samisk”. Girjje prienntiduváj vuostasj bále 1998, valla dat ij desti gávnnu girjjen.
– Girjje l ájnas viehkkenævo varresvuodadievnastusán ja bierri sadjihin liehket varresvuodabarggijda rijkav miehtáj. Dát viehkkenævvo máhttá vájkkudit jut sáme álmmuk oadtju buorep varresvuodadievnastusájt, gå pasiænnta duostoduvvá sámegielajn. Almmudagán ælla desti ienep dákkár girje, ja danen la riek buorre jut girjje ådåsis prienntiduvvá, javllá sámedikkeráde Runar Myrnes Balto (NSR).
Dan diehti gå girjje prienntiduváj vuostasj bále 1998, de la dárbbo girjev hiebadit dálásj hábbmimij, dáhtámasjijnna- ja prienntimvuogádagájda åvddål gå máhttá prienntiduvvat.
104 500 kråvnnåsasj doarjja vatteduvvá doarjjaårdnigis Doarjja varresvuoda-, hukso- ja mánájsuodjalusprosjevtajda.
Doarjja julevsáme varresvuodajuohkusa åvddåprosjæktaj
Runar Myrnes Balto
Árvu/Sámedigge
Sæmmi doarjjaårdnigin juolloduvvá aj 171 000 kråvnnåsasj doarjja Hábmera suohkanij, mij ájggu julevsáme varresvuodajuohkusav ásadit mij galggá sáme pasientajt bærrájgæhttjat, sijá lagámusájt ja julevsáme bájkkesebrudagáv. Prosjækta galggá dagáduvvat oarjjelsáme varresvuodajuohkusa vuogij milta ja ietjá álggoálmmukguovloj vuogij milta.
– Sáme varresvuodajuohkusa baktu vuogas vuohke bærrájgæhttjat sáme pasientajt ja guovlo álmmugav, nav vaj dievnastus navti sjaddá ienep jåksåmmærráj julevsáme álmmugij, javllá Myrnes Balto.
– Ájnas åvddåprosjækta
Sámedikkeráde mielas varresvuodavuogádahka mij sámij bærrájgæhttjá, jut dievnastusán la nuoges sáme máhtudahka ja jut sáme giella ja kultuvrra sebrudahteduvvá dievnastussaj la ájnas oasse ållidittjat sáme álmmugij avtaárvulasj varresvuodadievnastusájt.
– Dát la aj ájnas gå gehtjada dievnastusáv pasiænntaoaggásvuoda ja kvalitiehta bieles, javllá Myrnes Balto.
Julevsáme varresvuodaværmádahka, Hábmera suohkan ja Nordlánda skihppijviesso aktisattjat ásadi julevsáme varresvuodajuohkusav, ja sij li aj prosjæktaæjgáda.
Ságájdahttem jali gatjálvisá, guládalá sámedikkerádijn Runar Myrnes Balto (NSR), +47 977 73 778, runar.myrnes.balto@samediggi.no