Biehtsemáno 1.b álgaduvvá dán jagásj Sommerles.no-kampánnja, ja kampánnja vihpá gitta bårggemáno 31.b. Sommerles.no la buoragit vuorbástuvvam måttijt jagijt, ja dijmmá sæbrrin badjel 164 000 máná. Kampánja ulmme l mánájt måvtåstuhttet låhkåt nav ålov gå åvvå nahki aj ålles giesseloabev.

Dálla bessi rijka girjjevuorká ávvudit ja sáme mánájgirjálasjvuodav tjalmostahttet aj skåvllåmánájda låhkåmkampánja aktijvuodan.

- Lav ávon gå máhttep vájkkudit jut sáme oahppe gudi sæbrri kampánnjaj bessi ietjasa giellaj låhkåt, ja jut sáme mánájgirjálasjvuohta ienep tjalmostahteduvvá divna skåvllåoahppijda gudi sæbrri, javllá sámedikkeráde Maja Kristine Jåma (NSR).

Julevsáme guovlon Hábmerin sjaddá Sommerles 2022 rahpamdáhpádus divna 1.-7. Klássaoahppijda suohkanin biehtsemáno 1. b. Sommerles-girjjetjálle Mari Moen Holsve boahtá rahpamdáhpádussaj Hamsunsenterin Presteidan Hábmerin. Kampánja rahpam ávvuduvvá jieddnáslåhkåmijn julevsámegiellaj.

Sommerles.no dahká låhkåmav suohttasin!

• Sommerles.no digitála låhkåmkampánnja næhttabielen Sommerles.no. Máná dahki profijlav, tjáledi divna majt kampánnjaájgegávdan låhki ja tjoaggi tjuokkajt juohkka lågåduvvam biele åvdås.
• Duodden tjuokkajda máhtti máná aj digitála vuojtojt oadtjot ja vattáldagátjijt vuojttet majt máhtti girjjevuorkán viedtjat
• Máná bessi subttsasav låhkåt majt girjjetjálle Mari Moen Holsve la sierraláhkáj kampánja gáktuj tjállám
• Sommerles.no 1.-7. klássa mánájda ja vihpá biehtsemáno 1.b rájes bårggemáno 31.b rádjáj.
• Vestfolda ja Telemarka fylkesbibliotek ja Snuti AS li åvddånahttám Sommerles.

Gatjálvisá jali ságájdahttem guládalá sámedikkerádijn Maja Kristine Jåma (NSR), +47 47 24 23 66, maja.kristine.jama@samediggi.no