Hans Majestet Kong Harald V
Kimm Saatvedt, Det kongelige hoff
Sámedikkepresidenta, guddneduvvam sámedikkeájrrasa, gieres guosse,
Gålmmå ja lahkke vahkko dás åvddål oattjojma surgulasj diedov jut Gånågis Harald V lij ierit vuolggám.
Gånågis Harald moaddi guossen mijáv Sámedikken. Sån sebraj Sámedikke rahpamij vuostasj bále jagen 1993, ja maŋemus bále dijmmá gålgådismánon. Uddni l imálasj ájádalátjit jut sån tjuottjoj jur dán sárnneståvlån.
Gånågis Harald lij sámij venak. Gånågis låpptij sámij dilev Vuonan ja nannij Sámedikke merkadusáv. Sån vijdedij Vuona almulasjvuodav ja bivddij sámijt ietjas bævddáj.
Moaddi lij mijá gånågis åvddågiehtje. Ållo sáme mujtti Gånågis Haralda hålav jagen 1997, gå ándagis ánoj stáhta dárojduhttempolitihkas. Jagen 2005 ánoj ándagis Divtasvuona rádjálåvsåjs gå sij lidjin sivádahteduvvam rijkkabiehttemis doaro maŋŋela. Gånågis dádjadij jut histåvrålasj boastovuoda lidjin dáhpáduvvam ja válljij iesj dahkat dav majt máhtij divotjit – dálkodime diehti. Dåktår Ester Fjellheim la gåhttjum gånågis Haraldav psykolåvggån, gå sån duostoj sáme álmmuga báktjasijt ietjas bágoj.
Gånågis Harald ittjij bruvkku kråvnåjn vádtset. Valla jagen 1969 tsåkkåj sån sáme ålmmågahperav, gå såj Drådnik Sonjajn guossidijga Guovddagæjnov, dalloj lijga áttjak válldum kråvnnåprinssapárra. Gåvå sunnus vielggis muottáj lij sjaddam ikåvnålattjan. Gå sáme hærvva biktasijda gárvvunijga de såj tjalmostahtijga ja guddnedijga sáme kultuvrav.
Gijttep Gånågis Haraldav gå agev vuojnij mijáv, gå midjij gulldalij, ájnnasamos dajt bálijt gå dåbdduj nav vaj ij aktak ietjes dav dagá.
Bielnup vahko dás åvddål surgulasj diehto jut Prinsæssa Astrid lij ierit vuolggám, guokta vahko maŋŋel ietjas vielja.
Prinsesse Astrid, fru Ferner
Ola Vatn, Det kongelige hoff
Prinsæssa Astrid dåjmaj måttijt jagijt Vuona vuostásjfruvván, áhtjes Gånågis Olav V:a báldan.
Prinsæssa Astrid ja áhttjes Gånågis Olav guossidijga Finnmárkov jagen 1959. Skiippagurán sjattaj gånågisrájddo ganugit gå unna sámenæjttso lij tjuodtjelam gassko gæjno gálggitjit gånågissaj giedjegijt. Dát næjttso lij 7-jahkásasj Inger Helander Länsman. Dakkir æjvvalime gulluj prinsæssaj guhkes iellema tjadá Gånågisgoade dievnastusán. Ja nav lij sån oassen gånågisgoades mij la mijáv lahkanahttjám, mij la guossidam mijáv ja mijá åvdåstiddjijt bivddám Sloahttaj.
Prinsessav Astrid la vijdedam nissunij rållav Gånågisgoaden ja Vuona sebrudagán. Sån la oajbbum gieresvuoda åvdås ja familljaiellemav ietjas premissaj gáktuj. Sån la aj gájbbedam máhttelisvuodav aktidittjat barggoiellemav ja familljaiellemav. Prinsæssa manáj iesj sosiálakontåvrråj Majorstuan Oslon ja ánodij mánájgárddesajev ietjas báhttjaj – gå sujna ham lij barggo mav ájgoj tjadádit.
Prinsæssa ålli dievnnut nielje gånågisá ja bargaj Gånågisgoade åvdås gitta ietjas iellemin gæhtjáj. Sån lij vásstediddje, vájmmel ja berustij ulmutjijs gejt sån iejvvi.
Ráfe tjuovvus Gånågis Harald V mujtov.
Ráfe tjuovvus Prinsæssa Astrida mujtov.
Dálla sjaddá minuhtta sjávvo gånågis Haralda ja Prinsæssa Astrida guddnen.