UNESCO diedoj milta li gaskan 6000 ja 7000 giela væráldin uddni. 96 prosenta gielajs hålli dåssju gålmmå prosenta hoallijs. Moadda giela gáhtu gå e aneduvá, ja væráltvijddásasj digitalisierim aj nievret vájkkut værálda álggoálmmukgielajda.
Sihke Sámedigge ja Suohkan- ja guovllodepartemænnta aktijvalattjat sæbrri lågejahke bargguj.
– Sihtap adnet dáv lågejagev máhttelisvuohtan barggat iemeálmmukgielaj sihke nasjåvnålattjat ja rijkajgasskasattjat. Duola degu sihtap barggat vaj máhttelisvuohta åvddån anátjit sámegielav giehtatelefåvnåjn ja iesjguhtik digitála vuogádagajn, javllá Sigbjørn Gjelsvik (GB).
– Sáme vijddát aktisasattjat barggi rijkarájáj rastá ja mij barggap sámegielaj nannimijn bæjválattjat moatten dásen. Muv mihtto l oadtjot ájggáj nasjåvnålasj sáme giellalåpptimav gånnå li diedulasj vuorodime, ja jut mijá válljimijn li positijva synergijja ietjá álggoálmmukgielajda aj, javllá sámedikkeráde Mikkel Eskil Mikkelsen (NSR).
Sámedigge ja departemænnta li aktan nasjåvnålasj aktisasjbarggoforumav ásadam mij galggá lågejage bargov koordinierit Vuonan. Danna li duola degu sáme nuorajorganisasjåvnnå Noereh, Sáme allaskåvllå, Nuortta universitiehtta ja Råmså universitiehta - Vuona arktalasj universitiehtta, Máhttodepartemænnta, Sámeráde ja Giellaráde.
Aktisasjbarggoforum l nasjåvnålasj doajmmaplánav dahkam lågejahkáj. Nasjåvnålasj doajmmapládna galggá doajmmat giellalågejagebargo ækton ulmijn várjjalit, tjalmostahttet ja åvddånahttet sámegielajt Vuonan.
Doajmmaplána oajvvemihttomiere li stuoves ålles lågejage ratjástibmáj. Ásadusá ja organisasjåvnå ma nasjåvnålasj aktisasjbarggoforuman åvdåstuvvi galggi nasjåvnålasj doajmmaplánav tjuovvolit ja barggat vaj doajmmaplána mihttomiere ålliduvvi.