- Mij dåbddåp økonomijjalasj hásstalusájt moadda familjajda Finnmárkon ja Nuortta-Råmsån, danen sjaddá nåvkå mánájgárddesadjeårdnik gájk mánájda buorre fálaldahka. Dat sihkarasstá ja nanni familljaøkonomijjav moadda smávmánáfamiljajda, vaddá stuovesvuodav ja sjaddá aj rievddat ierit jåhtemhásstalusájt moadda sáme suohkanijn, javllá Mikkelsen

Sámedikke statistihka vuosedi jut ålles lándan li 893 máná gudi oadtju sáme mánájgárddefálaldagáv, ja dajs li 665 máná gudi oadtju mánájgárddefálaldagáv Finnmárkon ja Nuortta-Råmsån.

- Mån sidáv rámmpot Guovllodemografijjanammadusáv, gut oajvvadi nåvkå mánájgárddesadjefálaldagáv riekta ja ájnas doajmman måvtåstuhttet nuorajt jåhtet guovllosuohkanijda. Riekknim vuoset sáme familja Finnmárkon ja Nuortta-Råmsån máksi lagábu 22 millijåvnå kråvnå mánájgárddemáksemijn, ja dálla e da dárbaha das dav rieknigav mákset, ja dájna la Sámedigge barggam måttijt jagijt, javllá Mikkelsen.

- Årdnik hæhttu vijdeduvvat ietjá sáme guovlojda

Sámedikkeráde Mikkelsena mielas hæhttu nåvkå mánájgárddesadjeårdnik vijdeduvvat guoskatjit sámeguovlojt, dagu Råmsså, Nordlánnda, Trøndelag, Oslon/Viken, ja Innlandet. Sámedikke gåvvå vuoset jut la 228 máná gudi oadtju sáme mánájgárddefálaldagáv 24 mánájgárdijn – Råmsås nuorttan gitta Oslon oarjján. 

- Jus gájk sáme máná oadtju nåvkå mánájgárddesajijt, de dat årdnik sjaddá mákset dåssju 7,5 millijåvnå kråvnå oarjjela Nuortta-Råmså. Mij Sámedikken sihtap aktisasj sebrudaklåpptimav sáme familjajda. Dat la buorre guovllopolitihkka ja riek buorre giellapolitihkka, låhpat Mikkelsen.

Gatjálvisá jali ságájdahttem guládalá, sámedikkerádijn Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no