Giellavahko aktijvuodan sihtá Sámedigge låpptit ulmutjav, juohkusav jali organisasjåvnåv mij la vuohkasit adnám ja tjalmostahttám sámegielav ietjas bæjválasj dåjman. Sámedikke giellalåpptimguddnebálká vuojtte oadtju 30 000 kr ja dájddadiplåvmåv. Dájddadiplåvmåv la Marte Somby dahkam.
Sámedikkeráde l mierredam 2022 giellalåpptimguddnebálkáv vaddet Lemet-Jon Aagej, Aage Agnar Solbakkaj.
– Mån sidáv gijttet bargo åvdås majt Aage la dahkam gaskostittjat gielav ja árbbekabálasjmáhtov jåhkåsábmelattjaj viessomvuogij hárráj Deanun, ja sidáv sávvat vuorbev giellalåpptimbálkájn, javllá sámedikkepresidænnta Silje Karine Muotka (NSR).
Historiker Aage Solbakk.
Sametinget/Vaino Rensberg
Aage la måttijt jagijt barggam sámegielajn sihke árbbedábij gaskostime baktu ja fáhkagirjjetjállen. Sån la válljim ájgev biedjat máhtudakjuohkemij sámeálmmugij sámegiellaj. Sámedikke diedoj milta la sån læhkám fáron almodittjat birrusin 200 girje ja artihkkalijt, ienemusoasse nuorttasámegiellaj. Aage la historihkkár ja la buojkulvissan tjállám sámetjállemgiella histåvråv. Sån la aj dahkam ållu giellafágalasj bargov, duola dagu tjoahkkit bájkkenamájt, ja duodastam ja gaskostam gielalasj valjesvuodajt sáme árbbedábálasj æládusájn.
Aage la riegádam jagen 1943 Fanasgieddin. Sån la bajássjaddam ja viessom ålles iellemav Deatnogátten, ja la oahppam árbbedábálasj máhtov luossaguolástime ja luossaháldadime birra mánnávuoda rájes.
– Ietjas bargujn la vuosedam dav gielalasj valjesvuodav ja máhtudagáv luossa birra gávnnu árbbedábálasj luossaguolástimen ja luossaháldadimen. Sån la tjoahkkim, duodastam ja gaskostam gielalasj valjesvuodav luossaguolástime hárráj, luossa, bivddembájkij, bájkkenamáj ja árbbedábálasj luossaháldadime birra, javllá Muotka.
Sámedikke giellalåpptimbálkká almoduvvá Snåesan sådnåbiejve gålgådismáno 23. biejve. Da jage giellavahko álgadime ja iemeálmmukgiella lågejage (IDIL) aktijvuodan. Sámedikkepresidænnta Silje Karine Muotka ja rádesebrulattja Mikkel Eskil Mikkelsen ja Maja Kristine Jåma oassálassti rahpamin.
Lågå ienebu rahpamdåla birra:
https://sametinget.no/Kalender/CalendarEvent.aspx?Id=633&MId1=7