Prosjevta ulmme la nannit nuoraj åtsådallamav identitiehtas, aktisasjvuodas ja gulluvasjvuodav julevsáme giellaguovlon. Aktisasj åtsådallamij, aktisasj bargo baktu ja åhpadimes luondon galggá prosjækta vájkkudit buorep soapptsomav, buorre psykalasj varresvuodav ja jasska bajássjaddam birrasij. 

Ann-Elise Finbog Árvu/Sámediggi

– Dát la ájnas doajmma mij tjadná gielav, kultuvrav ja aktisasjvuodav aktij dan láhkáj jut nanni nuorajt, sihke sosiálalattjat ja identitiehtalattjat. Gå sámegiella ja árbbediehto aneduvvá aktijvalattjat jasska ævtoj vájkkut dat mihásvuodav ja gulluvasjvuodav, javllá sámedikkeráde Ann-Elise Finbog (SfP). 

Svierikváttsos la árbbedábálasj váttsos Vájsáluovtas Svierigin Vuodnabahtaj Hábmerin. Váttsos la histåvrålasj ájnas kultuvrraduobddágijn ja la åhpadimariedná giellaj, kultuvrraj ja árbbediehtuj. Váttsos la tjadáduvvam juohkka goalmát jage, jages 1994. 

Doarjja vatteduvvá doarjjaårdniga Givsedime ja sámenálsodime hieredibme baktu.