– Dán gávdan li åhpadiddje- ja mánájgárddeåhpadiddjestudenta læhkám vuoroduvvam. Árvustallam vuoset jut udnásj årdnik stuor åsijn vájkkut ulmmáj rekruttieritjit ienep sámegielak fáhkaulmutjijt. Økonomijjalasj vájkkudimnævo vájkkudi rekruttierimav, ja stipænndaårdnik doajmmá. Sæmmi båttå hæhttup ájádallat guhkesájggásattjat ja vijddásattjat nannitjit sáme giella ja kultuvrramáhtudagáv ienep åsijn sebrudagás, javllá sámedikkeráde Maren Benedicte Nystad Storslett (NSR).

Sámedikkeráde ævtot tjuovvusasj vuorodimsuorgijt åvddålijguovlluj:

Maren Benedicte Nystad Storslett Ørjan Marakatt Bertelsen

•  Joarkket udnásj vuorodimijt, sierra tjalmostimijn åhpadiddjeåhpadussaj ja mánájgárddeåhpadiddjeåhpadussaj ja giellasoahpojda.
• Merustit vijdedit årdnigav guoskatjit skihppijsujttár-, dålkkum-, logopedijja ja nuorttasáme giellaoahpojt.
•  Nannit diehtobargov stipænndaårdnigij hárráj.
• Dålat lagáp aktisasjbargov universitiehta- ja allaskåvllåsuorgijn rekruttierima hárráj ja merustit guhkesájggásasj ruhtadimmodellajt.
• Tjuovvolit bargov nanos giellaåhpadusmodellaj mánájgárden ja skåvlån ja vájkkudit máhtudaklåpptimij åhpadiddjij gaskan.
• Álgedit åhtsåmprosessav, duola dagu jahkásasj åhtsåmájggemierev biedjat ja åvddånahttet åhtsåmportálav.
• Merustit ienep fleksibilitiehtav årdnigin, guosská aj doarjja joarkkaåhpadussaj sáme sisanojn.
• Tjielggidit ådå måvtåstuhttemårdnigijt dagu barggovælggo, binnep låhkåmvælggo åhpadiddjijda ja duoddeårdnigijt kandidáhtajda ma barggi guoskavasj fáhkasuorgijn.

Sámedigge sjaddá låpptit sierra ássjev vuorodimij ja rievddadusáj hárráj stipænndaårdnigijn sámedikkegávda 2026-2029 ållestjåhkanimen javllamáno 2025. Rievddadusá fábmoduvvi 2026.

– La ållestjåhkanibme mij mierret vuorodimijt stipænndaårdnigij. Mijá ávttjidus la vilá vuorodit åhpadiddje-, mánájgárddeåhpadiddje-, ja giellaoahpojt. Dan diehti gå dárbo li stuorámusá daj hárráj, ja da biedji vuodov boahtteájggásasj rekruttierimij. Sæmmi båttå rahpap merustit ietjá fáhkasuorijt, valla dat hæhttu árvustaláduvvat udnásj budsjehta ja vuorodimij gáktuj, låhpat Nystad Storslett.

Árvustallamav dåhkki låhkåt Sámedikke næhttabielen