– Lip árvvalusájt buktám dán birra juohkka prosessan ja moatte konsultasjåvnåjn Máhtudakdepartementajn. Danen la riek måvtåstuhtte vuojnnet jut mijá barggo máhtudakåvddånimijn buktá vájkkudusájt, ja jut mánájgárdij ja skåvlåj duodde- ja joarkkaåhpadusjuogos doarjju mijá árvvalusájt ja ævtot dáv doajmman, javllá sámedikkeráde Mikkel Eskil Mikkelsen (NSR).
Mikkelsen javllá sámedikkeráde la vuojnnám bájkálasj máhtudaklåpptimårdnik ij dåjma. Ij aktasijn åbbålasj gåvvå makkir bájkálasj dárbo sáme mánájgárddesuorgen li ja makkir máhtudakfálaldahka li fáladuvvam ja fáladuvvi.
Sebrudagán la dálla máhtudakhiehtedilev ja sebrudagán vájlluji fáhkaulmutja. Dát guosská sáme mánájgárddesuorgen aj rijkav miehtáj. Mánájgárddeæjgádijda l hásstaliddje rekruttierit ja bisodit sámegielak barggijt, gå sijájs la dárbbo åbbålasj barggomárnánin. Vuojnnu nav jut mánájgárddesuorge bálkkádásse ij nagá gilppot dán barggomárnánin.
– Dát dille vájkkut nievres láhkáj mánájgárde sáme sisano kvalitiehttaj. Sámedigge mårås gå dát dille dahká dav, jut sáme mánáj riektá sáme mánájgárddefálaldahkaj, sámegiela ja kultuvra vuodojn, ij ålliduvá. Dát la tjielgga ájtto sáme mánáj riektáoaggásvuohtaj. Danen Sámedigge vuorot barggat, jut rámma ja struktuvra sáme mánájgárdijn ja ietjá mánájgárdijn gånnå l sámegiella fálaldahka, hiebaduvvi mánájgárdij dárboj milta, javllá Mikkelsen.
Duorastagá dán vahko giehtadallá Sámedikke ållestjåhkanibme sámedikkeráde tjielggidusá kvalitiehttaåvddånahttema birra sáme mánájgárddesektåvrån. Akta Sámedikke dåjmajs la Sámedikke doarjjaårdnigijt hiebadit nav, jut da åvdedi máhtudagáv. Sámedigge árvustallá galggá gus gájbbedit jut mánájgárde, ma dårjav oadtju, galggi máhtudaklåpptimdåjmajt tjuovvot ja giellabargov systematisierit gievras giellamodellaj milta.
Ássjepáhppára ássjáj 38/22 Sámedikkeráde tjielggidus rievddadusá Sámedikke doarjjaårdnigij sáme mánájgárdijda ja åssudagájda
Mánájgárdij ja skåvlåj duodde- ja joarkkaåhpadusjuogos la ragátmáno 28. B. 2022 dåjmadam tjielggidusá NOU 2022: 13: Med videre betydning – Et helhetlig system for kompetanse- og karriereutvikling i barnehage og skole Máhttodepartemænntaj, gånnå ævtodi moadda dåjma ásadibmáj åbbålasj ja guhkálasj vuogádagá mánájgárdij ja skåvlåj máhtudagá- ja karrierraåvddånahttemij.
Ságájdahttem jali gatjálvisá, guládalá sámedikkerádijn Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no