– La ájnas jut sámegielak máná Hábmera suohkanin bessi sáme mánájgárddefálaldagáv oadtjot juo tjavtja rájes, ja jut suohkan válldá åvdåsvásstádusáv sihkarasstet jut julevsámegielak mánájgárddefálaldahka bisoduvvá, javllá sámedikkepresidænnta Silje Karine Muotka.
Sámedikkepresidænnta Muotka ja rádesebrulasj Runar Myrnes Balto galggi uddni gasskavahko biehtsemáno 29.
Silje Karine Muotka
Åse M. P. Pulk/Sámediggi
biejve, tjåhkanibmáj Hábmer suohkanijn mij guosská Vuonak mánájårruha ja Árrana dilijt.
– Mij Sámedikke bieles sihtap viehkedit gånnå miján la máhttelisvuohta sihkarasstet mánájgárddefálaldagáv, javllá Muotka.
Ájnas fálaldahka nannit mánáj gielav ja bisodittjat julevsámegielav
Sámedigge la maŋemus jagijt vaddám moadda dårjajt mánájgárdde dåjmadahkaj ja Vuonak Mánájåroj la læhkám álgadimmánájgárdde Sámedikke mánájgárddeprosjevtan. Sámedikkepresidænnta navti tjuottjot ájnasvuodav sihkarasstet julevsámegielav boahtteájggáj.
– Mijá ájggomus la jut galggá gávnnu julevsámegielak mánájgárddefálaldahka Hábmera suohkanin. Dan diehti lip åvdebut juollodum duoddedårjav Vuonak Mánájårruhij váj sij galgalulun gávnnat tjoavddusijt guhkesájge perspektijvan. Juska Vuonak Mánájåroj la dal konkurssim, de ij Sámedikke ájggomusá rievda mij guosská fálaldahkaj, javllá Muotka.
Sámedigge la oassálasstám tjåhkanimijn Nordlánda fylkkasuohkanijn, stáhtaháldadiddjijn Nordlándan, Hábmera suohkanijn ja Suohkan- ja guovllodepartementajn. Sámedigge la aj oadtjum diedov jut bájkálasj æjgátjuogos hállit tjåhkanimev politihkalasj jådedimijn.
– Muv dádjadus juohkka oassevállde ássjes tjielggasit biedji åvddån dárbov bisodittjat julevsámegielak mánájgárddefálaldagáv. Dan láhkáj ij la gatjálvis jus sjaddá julevsámegielak mánájgárddefálaldahka, valla farra gåktu galggá organiseriduvvat, váj fálaldahka vat la sajenis. Mån lav måvtugis ja jáhkáv aktan máhttep buktet buorre tjoavddusijt. Sámedikke la duola dagu máhttelisvuohta dårjav vaddet 500 000 kr rádjáj ådå mánájgárddefálaldagá vuododibmáj, låhpat Muotka.