Lip vuostájválldám surggobudáv, jut Gånågis Harald V la ierit vuolggám. Sáme álmmuk la surgon.
Vuona Gånågisviesso la ájgij tjadá tjielggasit doarjjum sáme álmmugav, sáme kultuvrav ja mijá gielajt. Gånågis Haraldin la læhkám tjoahkkijiddje fábmo, ja la Gånågisvieso nanos dilev bisodam sámij gaskan.
Lip berustam Gånågisviesos ja lip agev lijkkum Gånågis Haraldij. Vásedijma jut dat lij gasskasattjat buorre gasskavuohta.
Gånågis la álu Sámev guossidam, duola dagu sæbrram árbbedábálasj ja allaárvvusasj Sámedikke rahpamijda, juohkka nælját jage. Suv bágo, jut Vuodna l vuododuvvam guovte álmmugij ednamij nali, la læhkám merkadus sámijda ja sáme politihka åvddånahttemij.
Gånågis la aj sæbrram ájnas dålajda. Sámijda lij stuora ja ájnas dáhpádus gå goappátjagá Gånågis ja Kråvnnåprinssa sebrajga lågåt Sámedikke allaárvvusasj rahpamij Kárásjjågån gålgådismáno 2025.
Lij aj ávvon Oslo sámijda, gå Gånågis vállji ávvudallat Sáme álmmukbiejvev aktan 500 bivddiduvvam guossij Oslo Rádevieson jagen 2023. Gålgådismáno 2020 guossidij Gånågis oarjjelsámev, Gïelevåhkoe rahpamin Snåase:n.
Oarjjelsáme aj adnin dav árvulattjan gå Gånågispárra guossidijga oarjjelsáme guovlojt, oarjje Nordlándav giesen 2023. Dán manon guoskadijga Duohtavuoda- ja såbadimkommisjåvnå guoradallamdiedádusá merkadusáv.
Gånågis la aj sáme åvdåstiddjijt sebrudahttám Slåhta almulasj dålåjda ietjas doajmmaájgegávdan. Miján, gejn la læhkám dat guddne jut lip bessam sæbrrat sujna, lip agev vuosstáj váldeduvvam liekkosvuodajn, duohta berustimijn ja diehtemvájnojn. Juohkka æjvvalibme lij dagu iejvvit láhka rádnajn.
Midjij merkahij riek ålov jut Gånågis Harald berustaláj mijá bargguj sámegielajt vuojnnusij buktet. Gånågis la aj moaddi mannam Sámen, sihke priváhta ja almulasj aktijvuodajn, ja sujna lidjin væhttsás bágo ietjas vásádusájs ja ulmusjæjvvalimijs dáppe Sámen.
Gånågis la dáj jagij nalluj, sierraláhkáj almulasj ja familjalasj dáhpádusájn, vuosedam jut sån la væhttsás, liekkos ulmusj ja suohttasijt buvtij alla dásen. Miján lij nav væhttsás gånågis, ja sujna lij sierralágásj dájddo vuosedittjat huvsov ulmutjijda gejt iejvvij iesjgeŋgalágásj sajen rijkan.
Gånågis Harald lij sebrudahtte ulmusj ja sån dádjadij sámij dilev. Sujna l læhkám stuora ja ájnas iellembarggo.
Ietjas moadda hålajn nasjåvnnåj vuosedij sån nanos fámojt sebrudahttet ja tjadnat akti iesjguhtiklágásj juohkusijt sebrudagán. Gånågis Harald lij mávsulasj ulmusj, gæssta báhtsi tjiegŋalis luotta.
Gånågis guodá familjav ma dálla sjaddi oahppat vijddábut viessot ietjasa boadnje, áhtje, vuohpa ja ádjá dagi.
Sáme álmmuga bieles sidáv sárnnot lieggasamos berustimev gånågisfamilljaj. Válldep oasev sijá suorgos.
Diktatjálle Áillohaš lij akta mijá stuorámus dájddárijs. Sån tjálij:
ja gå gájkka l vássám
ij gullu desti mige
ij mige.
Ja dat gullu
***
og når alt er forbi
høres ingenting lenger
ingenting
Og det høres
Gånågis la ierit vuolggám – Viesos Gånågis.
Kongen er død – Leve Kongen