2021:n tjadádij dutke Torkel Rasmussen guoradallamav Sámedikke åvdås, Lullesámegiela dille Vuonan – stratesjijja ja dåjma giela ælládahttemij, mij la vaddám Sámediggáj ájnas vuododiedojt ja åbbålasjgåvåv bargon mij la dagáduvvam lullesámegiellaj sihke Vuonan, Suoman ja Ruossjan, ja makkir giellafálaldagá gávnnuji. Guoradallamin ævtoduvvi dåjma giela ælládahttemij sierraláhkáj Vuona bielen, valla aktisasjbargujn gålldåsámij Suoman ja Ruossjan.
– Guoradallam la vaddám Sámediggáj buorep vuodov biedjat jåhtuj gielladåjmajt lullesámegiellaj, ja la åbbålasjgåvåv vaddám makkir máhttelisvuoda li åvddålijguovlluj lullesámegielav ælládahttet Vuona bielen Sámen, javllá Mikkelsen.
Guoradallam vuoset gávnnuji badjelasj 300 ulmutja gudi lullesámegielav buktij ja Vuonan gávnnuji birrusij 10 ulmutja gudi lullesámegielav ságasti. Gallegattja åhpadi lullesámegielav ietjas mánájda. Guoradallamin dættoduvvá ájnnasamos majt Sámedigge máhttá dahkat la hiebadit dilev nav vaj gålldåsáme Vuona bielen máhtti ælládahttet sijá identitiehtav, kultuvrav ja dajnas lullesámegielav sijá ietjasa vuoge milta.
Sámedikken la læhkám álmmuktjåhkanibme lullesámegiela dile birra, ja danna vuoseduváj la berustibme bisodit ja ruoptus válldet lullesámegielav gålldåsábmelasj birrasijn Vuona bielen Sámes.
Sámedikkeráde oajvvadus ållestjåhkanibmáj la jut Sámedigge dåhkkit lullesámegielav sáme giellan Vuonan. Sámedigge sihtá vájkkudit jut hiebaduvvá dille nav vaj sjaddá aktijva lullesámegiela giellabirás Vuona bielen Sámen. Sámedigge sihtá dahkat ietjas vuorodimijt budsjehtan nannitjit ja ælládahtátjit lullesámegielav, ja barggap dájna jut oadtjop aktisasjbargov rijkagasskasattjat lullesámegielav ælládahttemijn Vuona bielen. Sihtap aj barggat vaj ienep gålldåsámij bájkkenamá registrieriduvvi Guovdásj bájkkenammaregisstarij nav vaj da máhtti almulattjat aneduvvat, duola dagu galbajn ja kártan. Dåjma tjuovvoluvvi jahkásasj budsjehtajn.
Ássje 39/22 Lullesámegiela ælládahttem - tjuovvolibme diedádusás lullesámegiela dile birra Vuonan giehtadaláduvvá ållestjåhkanimen duorastagá gålgådismáno 13. biejve.
Ságájdahttem jali gatjálvisá, guládalá sámedikkerádijn Mikkel Eskil Mikkelsen (NSR), tlf. +47 917 42 161, mikkel.eskil.mikkelsen@samediggi.no
Ássjepáhppára