Gieres famillja, Mikkel Eskila rádna ja berraha

Sámedikke bieles sidáv sárnnot mijá berustimev ja huvsov Mikkel Eskil Mikkelsena lagámusájda, rádnajda. Uddni lip tjåhkanam surgujn Mikkel Eskil Mikkelsena hivástahttalibmáj. Mijá ájádusá mannij åvdemusát suv familljaj ja lagámusájda.

Mikkel Eskil lij ulmusj gut vuorodi stuorra oasev ietjas iellemis sebrudakiellemij ja politihkkaj. Ietjas bargo baktu Sámedikken vuorodi sån ássjijt stuor berustimijn sáme sebrudahkaj, ja Sámedigge sihtá mujtudallat suv politihkalasj ámmádav.

Mikkel Eskil lij 28 jage gå sån válljiduváj Sámediggáj vuostasj bále jagen 2017 Vuona Sámij Rijkkasiebre ájrrasin. Sån dalá sjattaj rádesebrulasj. Sujna lidjin edna vásstádussuorge ja hiebaj ja sjattaj roalla sisi jagij miehtáj. Sån ådåsis válljiduváj jagen 2021 ja dalloj lij sån válljiduvvam vuostasj ájrrasin Viestarmera válggabijran Sámediggáj. Mikkel Eskil vas oattjoj luohtádusáv rádeájrrasin ådå ráden.

Sámedikkeráden lij sån árvvogis politihkkár, sihke politihkkárij ja háldadusá gaskan. Ja sujna lij aj stuor árvvo ålgoldis akterajn, majna Sámedikke avtastaláj. Sån sjiehtadaláj iesjguhtik ráddidusáj ráde bieles moadda ájnas ássjijn sáme álmmuga bieles. Sån vuojnij tjoavddusijt rijkkarájáj badjel ja sujna lij gájksábmelasj perspektijvva. Sujna lij stuorra barggofábmo ja manádij ålov iejvvitjit ulmutjijt. Daj gietjav jagijn sån lij sámedikkeráde oadtjuj sån stuor værmádagáv

Mikkel Eskil persåvnnån lij låjes ja gulldaliddje nuppij máhtudahkaj ja åtsådallamijda. Dat dagáj jut almatja gudi æjvvalin sujna sámedikkeráden, dåbddin jut sån alvosvuodajn duosstoj sijá mårråhijt.

Sujna lij stuorra berustibme sáme gielajs, kultuvrajs ja sebrudakåvddånimes. Mikkel Eskil iesj lij ájnas julevsáme giellaguodde ja ráhtjastiddje sáme gielaj boahtteájge hárráj, duodden julevsámegiellaj de buvtij aj oarjjelsámegielav. Sån lij oasse mijá aktisasj rahtjamis sáme sebrudagá nannimijn, ja luotta li báhtsám suv bargo maŋŋel.

Mij diehtep iellem máhttá liehket gássjelis, ja almasj máhttá duosstot moatte hásstalusájt. Gå ulmutjav biesstep dákkir dilen da báhtsi moadda ájádusá ja dåbdo. Uddni la huoman surggo mij dæddá mijáv ienemusát.

Mij mujttep Mikkel Eskilav gåk sån lij – oasse mijá sáme familjas, ulmusj gænna lidjin tjehpudagá ja sjiebtjesvuoda, nav gåk gájkajn le. Iellem la moattebelak, ja gå jábmem ládá de la mijá åvdåsvásstádus duosstot surgov árvvogisvuodajn ja huvsojn.

Luluj Mikkel Eskil gávnnat ráfev. Mijá ájádusá mannij suv familljaj ja rádnajda dán låssis ájgen.

Sámedigge gijttá suv bargo åvdås.

Sávvap ráfev suv mujttuj.