Lágideaddjit, logaldallit, áicit ja earát geat oasálastet dutkansámi beivviin. Munnje lea stuora illu ja gutni buktit didjiide dearvvuođaid vuosttaš DutkanSápmái! Dutkan lea dehálaš suorgi servodagas, sihke dieđálaččat, servodahkii ja politihkkaovdáneapmái.
Mii eallit áiggis mas álgoálbmotmáhttu ja -perspektiivvat loktejuvvojit áibbas dárbbašlažžan máilmmiviidosaš hástalusaid dustemis. Seammás diehtit mii ahte sámi máhttu ain dávjá marginaliserejuvvo, dulkojuvvo earáid beales, ja váldojuvvo min iežamet konteavsttas. Danne lea hirbmat deaŧalaš, ahte mii sámit ieža meroštallat - maid dutkat, mo dan galgá dutkat, ja manin dat lea dehálaš.
Sámi dutkan - min iežamet eavttuid vuođul ii leat sáhka dušše máhtolašvuođa buvttadeamis. Dás lea sáhka fámus. Lea sáhka das geas lea riekti defineret duohtavuođa min álbmoga, min historjjá, kultuvrra ja servodaga birra. Guhká leat earát dahkan dan - olggobeale geahčastagain ja dávjá váilevaš ipmárdusain min perspektiivvaid ja árvvuid hárrái.
Muhto sámi dutkan, maid sámit ieža leat jođihan, addá midjiide vejolašvuođa váldit ruoktot dán fámu. Dat addá midjiide giela muitalit iežamet historjjáid, ovdánahttit iežamet doahpagiid, ja hástalit daid struktuvrraid mat ain leat hábmen dan vuogi mainna mii áddejuvvot majoritehtaservodagain.
Sámiid dutkama bokte beassat čuvget, mo koloniseren ain váikkuha min servodahkii. Sámi dutkama bokte mii sáhttit loktet ovdan sin eallimiid, jienaid ja vásáhusaid, geat guhká leat badjelgehččojuvvon - erenoamážit nissonolbmuid, bonjuid, nuoraid ja earáid geat dávjá leat ravda-avádagas maiddái min iežamet birrasiin.
Mun lean geahččan prográmma dáid beivviide. Ja sávan lágideaddjit leat hui rámis dainna go lea duođai erenoamaš buorre prográmma mii lea biddjon čoahkkái. Illudan guldalit min vuosttaš váldohálli (keynote) Anne-Maria Magga, go son čilge iežas dutkama mo galgá gávdnat ja dutkat sámi lágaid. Mii beassát čuovvut iešguđet ge sešuvnnaid. Dego mo dahkkonjierbmi hástala sámi dutkama, ja makkár vejolašvuođaid dat buktá. Ihttin lea maid dehálaš oassi prográmmas; mo rekrutteret olbmuid sámi dutkami, maid mii Sámedikki bealis maid fertet vuhtiiváldit iežamet barggus.
Jus mii galgat lihkostuvvat, de fertet mii čohkkejuvvot. Sámit leat okta álbmot, muhto mis leat maid hástalusat. Mii eallit njealji iešguđetlágán riikain, iešguđetlágan lágaiguin, iešguđetlágan ásahuslaš doarjjaapparáhtain, iešguđetlágan historjjálaš vásihusaiguin. Dattetge lea mis oktasaš árbi ja oktasaš boahtteáigi.
Muhto ovttasbargu gáibida eanet go oktasaš ulbmiliid. Dat gáibida maiddái saji gulahallamii, sierramielalašvuhtii ja jurddašeapmái - oadjebas ja iešmearriduvvon rámmain. Mii dárbbašit arenaid gos mii sápmelaččat sáhttit ságastallat ovttas iežamet áššiid birra, almmá stuorraservodaga seaguheami.
Mii dárbbašit saji numo dieđavahkku ja sámi arena gos sáhttit digaštallat sierramielalašvuođaid ráfis ja árvvusatnimiin. Gos mii sáhttit loktet ovdan dan mii lea váttis: siskkáldas vásttisvuođat - muhto maiddái min višuvnnat boahtteáigái. Go mii beassat doallat dákkár ságastallamiid iežamet eavttuid vuođul, de mii ráhkadit fámu siskkobealde. Mii hukset searvevuođa. Mii ovddidit iežamet politihkalaš ja intellektuála iešstivrejumi. Ja mii čájehit - sihke alcceseamet ja earáide - ahte mii leat álbmot geat váldit ovddasvástádusa iežamet boahtteáiggis.
Dán sáhtán dadjat loahpas: Sámi dutkan, sámi ovttasbargu ja sámi arenat eai leat dušše čikŋan - dat leat dárbbašlažžan. Jos mii galgat ceavzit álbmogin, ahtanuššat servodahkan, ja seailluhit ja viidáset ovddidit min identitehta ja kultuvrra, de fertet mii čuožžut stargadit iežamet máhtus, iežamet searvevuođas, ja iežamet vuođđovuogádagain.
Mii fertet duostat jurddašit stuorrát. Duostat jurddašit sámegillii. Ja duostat jáhkkit ahte boahtteáigi lea min iežamet hálddus.
Sávan olu lihkku Dieđavahkkuin! Ja maid giitu Sámiráđđái ja Sámi Allaskuvlii, go lehpet čohkken min deike Guovdageidnui dáid beivviid!
Sávvamis šaddet buori beaivvi mat buktet ođđa jurdagiid, ođđa vuoimmi ja adda miidjide reaidduid hábmet ihttá beaivvi Sámi!
Giitu!