Stuorra ávvo liehket dánna dán hávsskes ávvudallamin Suoksavuomen uddni, Tjáppa váttsos lij, ådå ruoddidum bálkájn. Sámedigge le ávon gå lip besap oassálasstet dårjajn dán ájnas prosjæktaj.
Mån lav ávon gå Árran ja Stájgo ja Hábmera histåvrråsiebrre li ásadum dáv mujttomerkav.
Moadda luojvojbarggotijma lij dási biejadum.
Juska dát bájkke uddni la ávtas, de lij dát ájgenis addnes sijdda, ja lij sijdda sunji gev galggap gudnedit uddni, namálattjat sámenissun Anna Pedersen, mihtos Suoksavuom(e)-Anna majt gåhttjon suv sámegiellaj.
Iv mån jáhke Anna iesj galgaluluj dáv ájádallat jut mujttomærkka galgaj biejaduvvat suv mujtton. Ienemusoasse suv iellemis viesoj sån dáj várij gaskan, familjajnis. Sij viessun dassta majt ednam, buve, ællo, miehttse ja váre váddin.
Valla Anna la ienemusát dåbdos duosstelis báhtariddjijdoalvvon. Doarrojágijn okkupasjåvnnåfábmo båhtin gitta mijá bájkijda, ja væráltdoarro vájkkudi Anna biejvijt aj. Sån sjattaj akta dajs gudi báhtariddjijt doalvoj Svierigij. Sån doalvoj ietjas sijdas gitta Gilldanjárggaj, rijkaráhte badjel ja dassta gitta Tjoalmevárráj. Subtsastuvvá sån skulggalij oajvvedoalvvuj Divtasvuonan ja sjiehtadijga æjvvalimbájkev tjoalmeváren. Gasskanisá sámástin, váj dujska ettjin galga dádjadit Anna subtsastij galla gábmagijt lij gårrum. Jáhkedahtte Anna bierggij moaddaj hekkav, aktan daj nuppij báhtariddjedoalvvoj vuonajn. Gal lij vádálasj barggo, ietjas hekkav bándan biejaj gájotjit nuppij hekkav. Nissunij barggo ja åhtsådallama nuppát væráltdoaron ælla oadtjum ietjaska sajev histåvrråsubtsastimen, ja ittji ga Anna oadtjo ánnsidimev ietjas bargos, sæmmi guosská sáme báhtariddjijdoalvojda Divtasvuonan. Vájvven diehtet jut moadda sáme báhtariddjedoalvvo oadtjon nievres giehtadallamav doaroj maŋŋela; ienni gå guddne ja árvvo majt dudaj ánssidin, de gáddalahtteduvvin.
Dan diehti la sierraláhkáj hávsske uddni ja vaddet dav gudnev majt Anna dudaj ánssit. Mujttomerkav la sáme dájddár Sissel Horndal hábbmim ja uddni vihtanasstá Anna jálosvuodav ja dåjmadimev. Mujttomærkka mujttádahttá boahtte buolvajt Anna mihtos bargos doarroájgen. Anna lij sáme doarromihtok.
Mån doajvov dát hiebaduvvam bájkke aneduvvá ålov ja sjaddá ávon guossijda. Dájna sidáv sávvap gájk vuorbev prosjvetajn ja biejvijn.