Sámedigge ja Ráddidus li sjiehtadam dahkat aktisasj plánav sáme luossaguollimkultuvra bisodime hárráj. Sivvan dasi la luossaguollim la viek binnum maŋemus jagijt sihke jågån ja nuoren, ja dat vájkkut ieme sáme luossaguollimkultuvrraj ja sihke giela ja árbbediedo doalvvomij boahtte buolvajda. Sámedigge ja Dálkádak- ja birásdepartemænnta dálla ánodi vuojnojt dán plána birra.

Gatjálvisá majda Sámedigge ja Dálkádak- ja birásdepartemænnta ánodi vásstádusájt

Plána vuodo l luossabivddo ájnas oasse sáme kultuvra luonndovuodos. Luossanálijt galggá guoddelis láhkáj háldadit, valla oassen dán plána bargos de ájggop árvustallat makta l vejulasj ietjá láhkáj háldadit váj sáme luossaguollimkultuvrra nanniduvvá.

Sámedigge ja Dálkádak- ja birásdepartemænnta ánodi vásstádusájt dási:

1. Majt galggap dahkat váj ieme sáme luossaguollimkultuvrav bisodip, nannip ja joarkedip, dan vuolen: 
   1. dålusj luossaguollim, dan vuolen teknihkalasj tjehpudagá, vuoge, dábe ja oahppamvuoge?
   2. árbbediehto luosa, luosaguollima ja dan iellemguovloj birra?
   3. sámegielak terma luosa ja luossaguollima birra, aktan bájkkenamá ja luondo ja jábij gåvvidime?
   4. luossaguollima vuojŋŋalasj práksisa, duola dagu gåktu ájlis sajijt la vieledam ja adnám?
   5. bájkálasj histåvrrå, dijda, subttsasa ja juojga ma li luossaguollimij tjanáduvvam?
   6. duodje, biebbmodábe ja ietjá kultuvralasj dábe ja æládusá ma luossaguollimis båhti?
   7. ietjá árvo, práksisa jali dábe ma li oassen bierggimis sáme luossaguollimguovlojn åvdep ájgij ja dálla?
2.  Mij bierri dagáduvvat váj binnet luossaguollima binnoma negatijva vájkkudusájt ulmutjij ruhtadilláj, sosiála iellemij, værmádagájda ja årromij sáme guovlojn gånnå luossaguollim la læhkám årroma vuodon?

Gåktu guláskuddamij oassálasstet?

Juohkkahasj guhti sihtá, bæssá ietjas vuojnov javllat. Tjálalasj guláskuddamjavllamusá sáddiduvvi skåve baktu Sámedikke næhttabielijn. Guláskuddamájggemierre: Javllamáno 31. b. 2025.

Oassálasstem guláskuddamin (sjiebmá guláskuddamjavllamusájda)

Jus i besa digitála skåvev adnet, de besa ietjat guláskuddamvásstádusáv påsta baktu midjij sáddit.

Sámediggi –Sametinget
Postboks 3
9735 Kárášjohka/Karasjok

Guláskuddamjavllamusá li almulattja almulasjvuoda lága milta ja almoduvvi sametinget.no næhttabielen.