Madi dágástaláduvvá ádjájuoksaslávgá birra, máhtá farra jårgijdit tjalmijt sáme festiválajda. Danna gávna duodalasj jasska sajijt gånnå moattebelakvuohta ávvudaláduvvá rabás fármij. Queera iemeálmmuk la da “Jahkásasj nuorttaguovllo álmmuk” Riddu Riđđu:n
Dagu moattes lev mån akta dajs gut anáv gaskav daj iehkeva dágástallamijda ja nievres næhttatsuojggim vejulasjvuodajda. E da álu buvte buorijt, ja allasim suodjalit la ájnas. Terror biehtsemáno 25. Biejve 2022 lij queer ulmutjij vuossti, ja maŋŋel lij konklusjåvnnå tjielgga: Ládadallam lidjin máhttet hieredit. Juska PST:a ájtoárvustallam dá jage ij buvte dárbov muodástuhttet, de dåbdåv ietjam rassje queeran dá jage.
Danen lav válljim ådå stratesjijjav: Mån ávvudaláv daj jasska båttåjda ma båhti. Márkomeannu Evenášši suohkanin la guhkev læhkám jasska sadje queerajda, juojddá majt tjielggasit gaskosti.
Ietjá buorre dáhpádus la Riddu Riđđu Gáivuonan Råmsån. Dá jage de dådji sij árbbedábev åvddån buktet iemeálmmugijt nuorttaguovlos “Jahkásasj nuorttaguovllo álmmugin” ja farra tjalmostahtti queera iemeálmmugijda. Dát sjaddá da jahkásasj buoremus jasska sadje, gånnå sjiervve- ja seksualitiehttamoattebelakvuohta ávvudaláduvvá. Gåhttjom sjaddá: Boade navti gåk dån le, ja ávvudalá moattebelakvuodav queer iemeálmmugij ålles væráldis!
Dá nanos ja tjielgga ariená vaddi midjij dårjav ja fámov. Dat fábmot mijá miellavarresvuodav. Sihke sábmen ja queeran, de diedáv mån jut váni nanos ja tjielgga sáme queer ariená li muv iellemkvalitiehtta rassjot.
Dan diehti la buorre gå Sámedigge la válldám fárruj sáme queer organisasjåvnåv Garmeres 2024 budsjehtan. Garmeres:in la ájnas roalla bargon máhttelissan dahkat moattebelakvuodav ja vuojnnusij buktet queer sámijt boahtte jagijt.
Ájgen gånnå juohkka ájnegisá buktij nievres sisanov pride ja ádjájuoksaslávgá gáktuj, la sierraláhkáj ájnas jut ásadusá, organisasjåvnå ja festivála tjielggasit åvdedi ietjas dårjav queer riektájda. Sámedigge hæhttu liehket nanos jiedna moattebelakvuohtaj, ja sámedikkeráden sidáv mån vájkkudit jut moattebelakvuohta ávvudaláduvvá.
Madi dån diŋŋgu billehtav sáme festivállaj, máhtá dån ávvudallat dassta jut moattebelakvuohta sáme sebrudagán vijdeduvvá. Jus ij Márkomeannu jali Riddu Riđđu hieba dunji, máhtá sæbrrat Sápmi Pride:an, mij jagen 2025 galggá dåladuvvat vuona biele Sámen.
Edna gijtto sáme festiválajda sijá rahtjama åvdås. Dat vuoset gåktu mij aktan máhttep doarjjat ja nannit moattebelakvuodav. Aktan mij hábbmim sebrudagáv gånnå gájka máhtti dåbddåt jasskavuodav ja jut lij buorisboahtem.
Dunji gut murkesta ádjájuoksaslávggáj skåvlån: Dat ij la slávggá duv vuossti. Dat la slávggá mij galggá vájkkudit jut juohkka ájnna mánná skåvllåsáljon galggá dåbddåt ietjas jasska ja mihá, ja dat la ávvudallam gieresvuodas. Ij ienep ja ij ga binnep, valla juska riek ájnas! Vuorbbe Pride:aj!