Gånågisáallavuohta majestiehta gånågis Olav V rabáj vuostasj Sámedikkev gålgådismáno 9. b 1989.

Sámedigge la sáme álmmuga álmmukválljidum parlamænnta Vuonan ja la iesjrádálasj álmmukválljidum orgádna. Sámij álmmukválljidum orgádnan Vuonan la Sámedikke ulmme barggat vaj dåhkkiduvvi sámij vuodorievtesvuodaj vuodon jut bærrájgåhtset ja nannit sáme kultuvrav, gielav ja sebrudahkaiellemav ja bisodit iesjguhtik sáme árbbedábijt. Sámedigge galggá sámij politihkalasj dilev nannit ja åvdedit sámij berustimijt Vuonan, duodden vájkkudit jut sáme álmmuk oadtju dássásasj ja rievtugis giehtadallamav.

Sámedigge la demokratijjalasj ræjddo sáme iesjmierredime gáktuj ja ávkkás ja dárbulasj dievnastusáj ja fálaldagáj åvddånahttema gáktuj sáme álmmugij. Sámedigge la sámij jiednaguodde rijka ja rijkajgasskasasj dásen. Sámedigge ájggu vájkkudit jut rievtesvuoda AN tjielggidusán álggoálmmugij rievtesvuodaj birra, sebrudahteduvvi dajda lágajda ja praktihkalasj politihkkaj ma vájkkudi mijá árggabæjvváj.

Sámedigge jådeduvvá parlamentalasj prinsihpa vuodon, gånnå rádediddje Sámedikkeráde doajmma la ållestjåhkanime luohtádussaj vuododuvvam. Sámedikke ållestjåhkanibme la Sámedikke bajemus orgádna ja fábmodus. Digge hiebat ietjas dåjmav Lága vuodo Sámedikke birra ja ietjá sáme riektádilij (Sámeláhka). Ållestjåhkanibme mierret dikke bargojt, aktan njuolgadusáj Sámedikke ietjá dåjmaj gáktuj. Juogos- ja ållestjåhkanime dåladuvvi niellji jahkáj.

Sámediggeválgga dåladuvvá juohkka nælját jage sæmmi biejve gå stuorradiggeválgga. Sámedigge la sámediggeválga bajemus válggaoajválasj. 7 válggabijra gåbttji ålles rijkav, juohkka válggabijra oadtju mandáhtajt bijra jienastuslågo stuorrudagá vuodon. Tjoahkkáj válljiduvvi 39 ájrrasa ålles rijkan.

Lågå aj: Sametingets arkitektur

Lågå aj: Kunsten på Sametinget