Almmustahttin: Samehets.no - bagadus mo raporteret ja váidit sámecielaheami

Sámecielaheapmi lea unohas ja suhttadeaddji. Dat sáhttá maiddái leat ráŋggáštahtti. Muhto maid sáhtát don dahkat jus vásihat sámecielaheami? Sáhttá leat váttis diehtit makkár vuoigatvuođat ja vejolašvuođat olbmos leat. Dáinna áigu Sámediggi juoidá dahkat. Danne leat mii ovttas Politiijadirektoráhtain ráhkadan bagadusa samehets.no. Doppe don oaččut rávvagiid dan birra maid don sáhtát dahkat iešguđet dilálašvuođain main don leat vásihan sámecielaheami. Dáppe gávnnat maiddái dieđuid das mii sámecielaheapmi lea, guoskevaš lágaid ja bálvalusaid gos gávnnat bagadusaid ja dieđuid.

Boađe almmustahttimii Sámedikki girjerádjosii Kárášjogas cuoŋománu 24. beaivve dii. 12.30-14.00 dahje čuovo almmustahttima njuolggastreama bokte Sámedikki neahtta-TV:s.

Dáhton
24. cuoŋománnu 2024
Goas
12:30 - 14:00
Báiki
Sámediggi - Sametinget, Kárášjohka/Karasjok

Prográmma 

12.30 Buresboahtin ja samehets.no presentašuvdna, sámediggeráđi Runar Myrnes Balto bokte 

12.45 Politiija bargu sámecielaheami vuostá, Politiijadirektoráhta ossodatdirektevra Bjørn Vandvik bokte 

12.55 Kárášjoga Sámi joatkkaskuvlla oahppit ovdanbuktet prošeavtta "Sámevuođa illu ja moraš".

13.00 Ságastallan: Ollugat vásihit sámecielaheami. Muhto eai leat gallis geat raporterejit dahje váidet dán. Maid sáhttit dahkat sevdnjesloguiguin?

13.45 Gažaldagat sálas

Guossohuvvo gáffe/deadja ja snoahpamuš.

Ságastallama oasseváldit:
- Sámediggeráđđi Runar Myrnes Balto
- Politiijadirektoráhta ossodatdirektevra Bjørn Vandvik
- Tromssa fylkka ohppiid- ja fidnoohppiidáittardeaddji Anita Lervoll
- facebook-joavkku Dokumenter samehetsen vuođđudeaddji ja hálddašeaddji Hanne Svinsås Magga
- Dásseárvo- ja vealahanáittardeaddji Bjørn Erik Thon searvá video-dearvvuođaiguin
- Sámedikki nuoraidpolitihkalaš lávdegotti lahttu Aina Madelén Nordsletta Aslaksen