Sámedikki birra

Sámediggi (lullisámegillii: Saemiedigkie, julevsámegillii: Sámedigge, nuortalašgillii: Sää´mtee´ǧǧ, upmisámegillii: Sámiediggie, bihtánsámegillii: Sámedigge) lea Norgga sámiid álbmotválljen ásahus.

Juohke njealját jagi válljejuvvojit 39 áirasa čieža válgabiirres. Sámediggi galgá nannet sámiid politihkalaš sajádaga ja ovddidit sámiid beroštumiid Norggas, bargat dan badjelii ahte sámi álbmot gieđahallojuvvo ovttaárvosaččat ja vuoiggalaččat ja bargat dan badjelii ahte sámit sáhttet seailluhit ja ovddidit gielaset, kultuvrraset ja servodagaset.

Vuosttaš sámediggeválga lei 1989 čavčča ja vuosttaš almmolaš Sámediggi rahppojuvvui golggotmánu 9. beaivvi 1989:s Kárášjogas gonagas Olav V bokte.