Sámedikkis lea mihttomearrin ahte luonddu- ja resursavuođđu sámi guovlluin hálddašuvvo dainna jurdagiin ahte min boahttevaš buolvvaide sihkkarastojuvvo eallinvuođđu ja vejolašvuohta ovddidit sámi kultuvrra. Hálddašeapmi galgá váikkuhit sámi kultuvrra, ealáhusbarggu ja servodateallima nannema. Resursaguovllut ja luondduvalljodat leat deaŧalaš oasit sámi kultuvrra ávnnaslaš kulturvuođus. Dat bidjá vuođu sámi ealáhusbargui, ássamii, kulturbargui ja servodatovddideapmái. Danne lea areálaid, luonddu ja kulturárbbi buorre hálddašeapmi deaŧalaš sámi kultuvrra suodjaleami ja ovddideami sihkkarastimii.