Sámedikkis lea hálddašanovddasvástádus sámi kulturmuittuin ja sámi vistesuodjalusas miehtá riikka. Sámi kulturmuittut leat mearkkat sámi ássamis ja orrumis, dat gaskkustit máhtu min máttuid eallineavttuid, resursageavaheami, oskku ja eanadatgeavaheami birra. Sámi kulturárbi addá midjiide máhtu, identitehta ja vásihusaid. Kulturárbi addá maiddái deaŧalaš vuođu mii bidjá eavttuid buot areálaplánemii ja sisabahkkemiidda eanadagain.