Sámediggái lea boahtán máhcahangáibádus mii guoská 21 olbmobázahussii mat leat vižžojuvvon Paččjokkas / Báhčaveajis Mátta-Várjjagis.
Bázahusat leat vižžojuvvon Gravholmenis Paččjokkas / Báhčaveajis áigodagas 1958–1959. Gravholmen lei Paččjokk sijdd / Báhčaveaisiidda hávdesadji, ja bázahusat gullet iešguđet áigodagaide. Boarráseamos bázahusaid sáhttá čatnat ovdal risttalaš áigái, ja eará bázahusat leat maŋŋel hávdáduvvon, maiddái risttalaš hávdádemiin, dán hávdesadjái. Paččjokk sijdd / Báhčaveaisiida juhkkojuvvui stáhtaid rádjegeassimiid dihte, ja dál orrot maŋisboahttit Norggas, Suomas ja Ruoššas.

Bázahusat leat Oslo universitehta bioantropologalaš čoakkáldagain. Sámedikkis lea, šiehtadusa bokte Oslo universitehtain, váldi mearridit galget go bázahusat máhcahuvvot vai daid sáhttá ođđasis hávdádit. Danne lea ásahuvvon bargojoavku man bargun lea čuvget ášši buoremus lági mielde. Bargojoavkkus leat Oslo universitehta, Ä´vv Saa´mi Mu´zei, Saa`mi siidsååbbar Čeʹvetjäuʹrris / Čeavetjávrris ja Norgga beale Sámediggi.

Sámediggái lea dehálaš gulahallat guoskevaš nuortalaš birrasiiguin vai gullá maid sii oaivvildit áššis. Čoahkkin heivehuvvo nu ahte nuortalaččat sáhttet doppe ságastallat gaskaneaset. Danne čoahkkimat eai leat rabas mediaide.