– Dát la ájnas oasse nannitjit julev- ja ubbmemsámegielav. Mánájgirje la tjåvda sihke giellaåvddånahttemij ja låhkåmávvuj, javllá sámedikkeráde Ole Henrik Bjørkmo Lifjell.

Dinosaurgjengen la tjáledum Lars Mæhles ja la bájnos ja geldulasj gåvvågirjjerájddo. Dat hiehpá sihke jieddnáslåhkåmij åvddåskåvllåmánájda ja mánájda gudi li álggám låhkåt iesj. Moadda máná 4 ja 12 jagen gaskan sjaddi adnet ávov dájs girjijs, sierraláhkáj da gudi hárjjidalli låhkåt sámegiellaj.  

– Mij dárbahip ienep sámegielak girjijt mánájda majt sij hálijdij låhkåt. Dá li girje ma moaddása dåbddi dárogielas, ja mij dal sjaddá lågådahtte guokta dajs unnep sámegiellaj, javllá Lifjell.

Nordlánnda fylkkasuohkan vuorot julev- ja ubbmemsámegielav. Sæmmi båttå barggá Trööndelagen fylhkentjīelte (Trøndelag fylkeskommune) jårggålimijn nuorajgirjijs oarjjel- ja bihtámsámegiellaj. Aktan sjaddá dat vijdes girjálasjvuodalåpptim sáme mánájda guovlojn gånnå sámegiella dárbaj låpptimav.

– Gávnnuji riek moattes gudi buktij julevsámegielav, valla sij dárbahi ienep girjijt majt máhtti låhkåt mánájdisá. Ubbmemsámegiella hárráj la dárbbo riek stuorre. Dánna la sáhka ælládahttet gielav ja vaddet mánájda ja ållessjattugijda juojddá man birra máhtti tjåhkanit – juojddá låhkåt, oahppat ja masta tjajmmat, låhpat Lifjell.

Doarjja juolloduvvá Sámedikke doarjjaårdniga baktu Prosjæktadoarjja sáme girjálasjvuohtaj.