Ole Henrik Magga får nordisk samisk språkpris Gollegiella 2022
Ninni Andersson/Regeringskansliet
Svierik la värddalánnda gå giellaguddnebálkká Gållegiella lågåt bále vatteduvvá. Guddnebálkká vatteduvvá gå ministar- ja sámediggepresidänntatjåhkanibme ásaduvvá Stockhålman ådåjakmáno 18. b. 2023.
– Várjjalit ja åvddånahttet sámegielajt la sieldes ájnas. Ole Henrik Magga l mälggadav årrum ájnas åvddågåvvån sámegielak adnemij hárráj, ja dajna lav mihá gå mån uddni oattjov vaddet giellaguddnebálkáv Gållegielav Ole Henrik:ij, javllá Svierik kultuvrraministar Parisa Liljestrand.
– Mån lav harmmis ávon gå oattjov guddnedit Ole Henrik Magga:v guddnebálkkáj-Gållegiella 2022. Sådnå ánssit goappátjagá tsuojgoduvvat ja guddneduvvat ålles suv viessomdago åvdås, javllá Håkan Jonsson, Svierik sámedikke stivrraåvddåulmusj.
Ole Henrik Magga l riegádam 1947 Guovdageainon, Vuonan. Sån la moadda lågejage barggam vaj sámegiela galggi åvddånit, iehtjádij siegen akademak åhpadusáj, åtsådimijn ja åvddånahttemijn åhpadimnävojs ja åhpadimijn.
Magga l dahkam dálásj nuorttasáme tjállemvuogev, tjállám la oarjjelsáme grammatijkav aktan Lajla Mattsson Magga:jn ja l säbrram gå åvddånahtij goappátjagá ubbmem- ja bihtámsáme tjállemvuogijt.
Magga l aj viehkedam gå vuododij rijkalasj ja rijkajgasskasasj álggoálmmukinstitusjåvnåjt, buojkulvissan lij vuostasj åvddåulmusj AN:a stuoves forumin álggoálmmukássjijda ja aj gå vuododij Sámedikkev Vuonan, gånnå Ole Henrik Magga válljiduváj vuostasj åvddåulmutjin.
Giellaguddnebálkká Gållegiella l ásaduvvam loakkátjit ulmutjijt åvddånahttet ja älládit sámegielajt. Guddnebálkká vatteduvvá juohkka nuppe jage.
Lågå ienebuv guddnebálká birra ja åvdep guddnebálkkávuojttij birra.
Gollegiella 2022
Ninni Andersson/Regeringskansliet