Juolloduvvá millijåvnå sáme mánájgárddeprosjevtajda

Juolloduvvá millijåvnå sáme mánájgárddeprosjevtajda

Sámedikkeráde la juollodam 4,4 millijåvnnå kråvnå 27 prosjevtajda mánájgárdijn ma vájmmelit barggi sáme giela ja kultuvra nannimijn ja åvddånahttemijn mánájgárdijn.

– Dán jage li boahtám ienep åhtsåmusá gå åvdep jagijn, ja dat la riek buorre. Ihkap la tjanáduvvam Sámedikke åvddånahttemprosjæktaj SÁMOS, jali jut ienep sihti sámefálaldagáv vaddet mánájgárdijn, javllá sámedikkeráde Mikkel Eskil Mikkelsen (NSR).

Doarjjaårdnigin li dán jage vuorodam dårjajt prosjevtajda ja åvddånahttembargguj mánájgárdijn, ja da li giellaåvddånahttemprosjevta, bájkálasj åvddånahttemprosjevta gånnå dættoduvvá árbbedábálasj barggo, ådå sámegielak mánájgárddefálaldagá ásadibme ja pilåvttåmánájgárdij åvddånahttem ma li válljiduvvam sebratjit mánájgárddeprosjevtan SÁMOS (Sáme máná ådå pedagogihkalasj lanjájn).

Dán jage rudá li juogeduvvam 10 giellaprosjevtajda, 13 bájkálasj åvddånahttemprosjevtajda gånnå dættoduvvá sáme árbbedábálasj barggo ja nielje prosjevtajda gånnå l aktijvuohta pilåvttåmánájgárdij åvddånahttemij.

Gehtja divna 2021 juollodimij prosjevtajda ja åvddånahttembargojda mánájgárdijda dánna (PDF, 142 kB)

Giellaåvddånahttemprosjevta

Árvu/Sámediggi

Giellaåvddånahttemprosjevtaj vuorodimijs oadtju duola dagu oadtju Furua mánájgárdde Áltán 125 500 kr iesjguhtik dåjmajda sáme gielav ja kultuvrav åvddånahtátjit. Máná galggi duola dagu oahppat muhtem sámegielbágojt, árbbedábálasj sáme ståhkamvuogijt, ja sæbrrat boahttsuj njuovvamij ja miessemærkkomij. Ietjá mánájgárdde Áltán, Holmen gårds- og naturbarnehage, oadtju 55 000 kr boanndodittjat mánáj ståhkamav ja ja ståhkusa ábnnasij ja vásádusáj ma sáme gielav ja kultuvrav åvddånahtti.

Giellaprosjevtaj vuorodimijn oadtju aj Ferista friluftsbarnehage Roandemin 100 000 kr prosjæktaj sáme giellakurssa, sihti vaddet sáme mánáj æjgádijda Roandema suohkanin máhttelisvuodav åhpatjit sámegielav mánáj siegen. Galggá liehket kurssa maŋŋel gasskabiejve æjgádijda nuorttasámegielan, oarjjelsámegielan ja julevsámegielan.

– Dættoduvvam la jut jus sámegielav luluj máhttet ælládahttet Roandemin, de gájbbeduvvá aj æjgáda oadtju máhttelisvuodav gielav oahppat, javllá Mikkelsen.

Bájkálasj åvddånahttemprosjevta gånnå sáme árbbedábálasj barggo dættoduvvá

Bájkálasj åvddånahttemprosjevta gånnå sáme árbbedábálasj barggo dættoduvvá vuoroduvvá duola dagu Rishaugen mánájgárdde Áltán 128 000 kråvnåjn sáme giela ja giellavásádusáj nannimij. Sij galggi duola dagu guossidit ællogárdev ja sæbrrat boahttsuj njuovvamij.

Espira mánájgárdde bájken Stjørdal oadtju 75 000 kr smáves mánáj sáme kultuvrragaskostibmáj ja giellamåvtåstuhttemij. Prosjevtav ulmmen la sihkarasstet jut máná ja familja bessi ietjaska sáme gielav ja kultuvrav åvddånahttet.

– Dát mánájgárdde ij la åhtsåm dårja åvddåla, ja suohtas la vuojnnet gå sij sihti sáme giella ja kultuvrra galggá liehket oassen sijá mánájgárddeárggabiejves, javllá Mikkelsen.

Ådå åhtsåmvuoro jahkáj 2022 rabáduvvá guovvamáno álgon.

– Ávttjiv mánájgárdijt gånnå la sámegielak fálaldahka, ja mánájgárdijt ma sihti fálaldagáv vaddet mij åvdet sámegielak mánáj sáme giella- ja kultuvrramáhtudagáv åtsåtjit, javllá Mikkelsen.

Ságájdahttem jali gatjálvisá, guládalá sámedikkerádijn Mikkel Eskil Mikkelsen (NSR), tel.47 917 42 161, mikkel.eskil.mikkelsen@samediggi.no