– Vaj mij duodaj galggap máhttet barggat buorre bargov ævtodit ájn buorep válggaårdnigav, de dárbahip mij sebrudagá viehkev. Gåggu li hásstalusá ja majt máhttá buoredit? Dasi sihtap mij árvvalusájt, javllá válggaårdnikjuohkusa jådediddje Ragnhild Nilsson.

Juogos la mandáhtav oadtjum Sámedikke ållestjåhkanimes. Sij galggi duola dagu válggabijrajt árvustallat, mandáhttajuogov, sáme háldadimguovlojt ja unnep giellaguovloj åvdåstimev, ja aj dássemandáhtajt ja vuolemusrájáv. 

– Galggap ávttjimusájt buktet dasi gåktu válggaårdnik buoremusát luluj åvdåstit Sámev. Danen hæhttup mij diehtet majt ulmutja ájádalli ássje birra. Mij buoragit doajmmá dálla ja majt vejulattjat galgaluluj rievddadit, javllá Nilsson. 

Juohkusin la postdåktår Ragnhild Elisabet Nilsson, dutkamprofæssor Mikkel Berg-Nordlie, sadjásasj rievtor Jonan Stein, jurissta Line Aimee Kalak ja seniorrádevadde Lars Magne Andreassen. Sij galggi ietjas diedádusása gálggit maŋemusát bårggemáno 1. biejve 2027. 

Árvvalusájt máhttá e-påsta baktu sáddit juohkusij, adræssaj valgaortnet@samediggi.no, åvddål snjilltjamáno 1. biejve 2027. 

Lågå ienebu válggaårdnikjuohkusa birra

Válggaårdnikjuogos. Juohkusin la postdåktår Ragnhild Elisabet Nilsson, dutkamprofæssor Mikkel Berg-Nordlie, sadjásasj rievtor Jonan Stein, jurissta Line Aimee Kalak ja seniorrádevadde Lars Magne Andreassen. Dánil Røkke