Deanučázádat lea erenoamáš dilis go guoská luosa mearkkašupmái sámi kultuvrii. Čázádat lea stuorámus luossajohka riikkas mas sullii 70 % bivddus lea Norgga bealde ja 30 % bivddus Suoma bealde. Luossa Deanučázádagas lea don doloža rájes leamaš sámi kultuvrra ávnnaslaš vuođđu gielddaide sihke Norgga ja Suoma bealde.

Luossa lea vuođđun sámiid álgoássamii guovllus ovdal go stáhtat šadde ja sisafárrejeaddjit bohte. Máttut leat eallán luonddus ja luondduin ja deanuluosain čuđiidjagiid, seammás go árbedieđut leat gaskkustuvvon buolvvas bulvii. Báikkálaš sámi bivdu lea leamaš ceavzil iige dat goassige leat leamaš makkárge várran luossanállái.

Áššečuolbma badjelmeare bivddus Deanujogas bođii easkka dalle go Suoma ja Norgga eiseválddit bidje stáhtalaš hálddašeami ja ollu jagiid badjel masse bearráigeahču go suvve boahtit olgobeale bivdiid mat gáržžidedje báikkálaš vuoigatvuođaoamasteddjiid bivddu. 

Loga sámediggeráđi čilgehusa luosa birra (PDF, 492 kB)