Cealkámušat sápmelaččaid birra mat stigmatiserejit, badjelgehččet, loavkidit dahje áitet. Cealkámuš sáhttá leat juoga mii daddjo dahje čállojuvvo. Sáhttet leat sánit, tevnnegat dahje symbolat. Cielaheapmi sáhttá dáhpáhuvvat daguid oktavuođas, ovdamearkka dihte veahkaválddi.
Negatiiva miellaguottut sáhttet boahtit váilevaš máhtu, empatiija, oktavuođa dahje luohttámuša geažil. Sámiid ja sámi kultuvrra badjelgeahččan lei oassin dáruiduhttinpolitihkas. Danne sáhttá sámecielaheami ipmirdit dáruiduhttima maŋŋeváikkuhussan.
Sámedikki doaibmaplána sámecielaheami vuostá
Sámecielaheamis leat váikkuhusat ovttaskasolbmui, Váikkuhusatsápmelaččaide joavkun ja váikkuhusat demokratiijii. Danne mearridii Sámediggi ovttajienalaččat Doaibmaplána sámecielaheami vuostá jagis 2022. Doaibmaplána lea Sámediggedieđáhusa Sábme jállu doaibmabidju, ja sisttisdoallá 17 doaibmabiju maiguin Sámediggi galgá bargat jagi 2025 rádjai. Dat sisttisdoallá doaibmabijuid maid Sámediggi galgá čađahit, doaibmabijuid mat leat sorjavaččat ovttasbarggus ja doaibmabijuid mat leat sorjavaččat das ahte nationála eiseválddit váldet ovddasvástádusa.
Loga Sámedikki doaibmaplána sámecielaheami vuostá (PDF, 606 kB)
Samehets.no – bagadus mo raporteret ja váidit sámecielaheami
Sáhttá leat váttis diehtit makkár vuoigatvuođat ja vejolašvuođat olbmos leat jus vásiha sámecielaheami. Danne lea okta doaibmabijuin Sámedikki doaibmaplánas sámecielaheami vuostá dat ahte Sámediggi galgá hábmet bagadusa dasa movt raporteret ja váidit sápmelašvuođa. Sámediggi lea dál, ovttas Politiijadirektoráhtain, almmuhan neahttasiiddu samehets.no. Neahttasiidu lea sápmelaččaid várás geat leat vásihan sámecielaheami, ja neahttasiidu bagadallá maid sáhttá dahkat iešguđet dilálašvuođas. Bagadus váldá vuolggasadjin iešguđetlágan arenaid gos sáhttá vásihit sámecielaheami.
Fina neahttasiiddus samehets.no
Doarjja givssideami ja sámecielaheami eastadeapmái
Okta doaibmabijuin doaibmaplánas sámecielaheami vuostá lea ahte Sámediggi galgá ásahit doarjjaortnega sámecielaheami eastadeapmái. Ortnega ulbmilin lea movttiidahttit organisašuvnnaid, joavkkuid ja servviid eastadit givssideami ja sámecielaheami, ja ovddidit oadjebas ja buori bajásšaddanbirrasa báikegottiin sámi mánáide ja nuoraide.
Loga eambbo ja oza doarjaga dás