Konvenšuvdna vuođđuduvvá vuođđoolmmošvuoigatvuođaide, ovttaskas olbmo árvvolašvuhtii ja árvui ja ovttalágan vuoigatvuođaide almmáiolbmuid ja nissonolbmuid gaskka. Konvenšuvnnas meroštallojuvvo ahte doaba nissonolbmuid vealaheapmi lea juohkelágan sierra láhkai meannudeapmi, olggušteapmi dahje ráddjen sohkabeali vuođul mas lea áigumuš dahje ulbmil gomihit dahje fuonidit nissonolbmuid vuoigatvuođaid ja vuođđofriijavuođaid politihka, ekonomiija, sosiála, kultuvrra dahje eará surggiin, sorjjakeahttá siviila stáhtusis ja sohkabeliid dásseárvvu vuođul. Konvenšuvdna guoská nissonolbmuid vuoigatvuođaide sihke priváhta eallimis ja go guoská formála vuoigatvuođaide servodagas. Konvenšuvnnas eai leat makkárge sierra mearrádusat álgoálbmogiid várás, muhto das válddahuvvo nissonolbmuid juohkelágan vealaheapmi iešguđege arenain.

• Loga ON nissonvealahankonvenšuvnna 

Nissonvealahankonvenšuvnna čađaheapmi bearráigehččojuvvo FNs nissonvealahankomitea (CEDAW) bokte, mas leat 23 nissonriekteáššedovdi. Stáhta raporterejit jeavddalaččat komiteai.

Nissonkomitea dutká raporttaid, searvvaha eará gálduid dieđuid ja čujuha iežas fuolastumiid ja rávvagiid stáhtaide sin konkluderejeaddji áicamiid bokte. Komitea hábme oppalaš rávvagiid ja evttohusaid. Rávvagiid vuođđun leat sisdoallu ja fáttát konvenšuvnnas mat sáddejuvvojit stáhtaide.