Loga VEAHKA-raportta (PDF, 643 kB)

Dán raporttas lea veahkaválddálašvuođa ja seksuála illasteami boazodoalloservodagain guorahallojuvvon. Okta guovddáš vuođđu dutkamii lea Duohtavuođa- ja soabahankommišuvnna raporta (2023) mii lea čájehan sosiála, politihkalaš ja psykologalaš goluid assimilašuvnna- ja dáruiduhttinpolitihka geažil. Dutkan čájeha ahte go dutká veahkaválddálašvuođa ja seksuála illasteami, de berrešii váldit vuhtii dan spesifihkka historjjálaš konteavstta.

Guorahallama vuođđun leat jearahallamat olbmuin geain lea duogáš boazodoalus, ja fágaolbmuin geat barget boazosámi birrasiin. Raportta lea Nationála gealboguovddáš veahkaválddálašvuođa ja traumáhtalaš streassa ektui (NKVTS) čađahan ovttasbargguin Sámi našuvnnalaš gealboguovddážiin – psyhkalaš dearvvašvuođasuddjen ja gárrendilli (SÁNAG). 

Raporta čájeha máŋggabealat ja kompleaksa gova, mas sihke veahkaválddálašvuohta olggobealde - nu go vealaheapmi, areálagáržžideamit ja historjjálaš noađit - ja veahkaválddálašvuohta siskkáldasat, fertejit gehččojuvvot ovttas. Dat deattuha ahte dáruiduhttin, olgguldas deaddu ja eallindilálašvuohta sáhttet váikkuhit sihke ovttaskas olbmuid ja oktavuođaid boazosámi servodagain. 

Okta guovddáš bealli lea dárbu veahkkeapparáhtii mii lea buorebut heivehuvvon boazodoalu eallinvuohkái, ja maiddái eanet máhttu das mo iešguđetlágan veahkaválddálašvuođat ja noađit leat čadnojuvvon oktii. 

Dát guorahallan veahkaválddálašvuođa ja illastemiid birra boazosámi servodagas lea čađahuvvon Norgga boazosápmelaččaid Riikasearvvi (NBR) álgaga vuođul ja gulahallama bokte Sámedikkiin ja NBR:in, mii lea leamaš ovddastuvvon guorahallama referánsajoavkkus. Vuođđun leat ovdalaš NKVTS-raporttat mat guoskkahit veahkaválddálašvuođa sámi servodagain.