Loga dievasčoahkkinášši: 006/24 Duohtavuohta ja soabadeapmi - Olmmošlaš golut
Meannuduvvo Bajásšaddan-, fuolahus- ja oahppolávdegottis.
Ovddasvástideaddji ráđđelahttu: Runar Myrnes Balto
Kommišuvdna lea vuđolaččat duođaštan máŋggalágan vearrivuođaid sámi álbmoga vuostá. Sámediggeráđđi oaivvilda ahte raporta duvdá eret ovttage gii sáhttá jáhkkit ahte dáruiduhttima ja vearrivuođa olmmošlaš golut gullet vássán áigái. Historjjálaš vearrivuođas leat ain dálge váikkuhusat ovttaskas olbmuide, ja ollu ferte njulgejuvvot.
Sámediggeráđđi doarju máŋga evttohusa maid kommišuvdna ovddida, earret eará doaibmabijuid birra sámevaši vuostá, dearvvašvuođafálaldagaid ovddideami birra, doaibmabijuid birra veahkaválddi vuostá, iešsoardimiid eastadeaddji doaibmabijuid birra, dutkama birra ja viidáset máhttoovddideami birra.
Sámediggeráđđi váldá earret eará ovdan dárbbu ođđasis organiseret sámi dearvvašvuođabálvalusaid, vai dat ožžot buriid ovdánanvejolašvuođaid, ja dárbbu ollu viidáset dutkamii dáruiduhttima ja eahpedearvvašvuođa oktavuođain dálá servodagas.
Sámediggeráđđi evttoha earret eará viidáset barggu geahčadit movt erenoamášskuvllat, ovdamearkka dihtii bealjehemiidskuvllat, leat váikkuhan dáruiduhttimii. Eará evttohus lea ahte riektebuhtadus daidda sápmelaččaide geat leat massán oahpu, ođasmahttojuvvo nu ahte eanebut sáhttet dan geavahit ja ahte buhtadusmáksu loktejuvvo.