Guvllolaš gulaskuddan
Duohtavuođa- ja soabahankommišuvnna raporttas ja dan olis go Sámediggi ja Stuoradiggi leat meannudan dan, lea čielgasit boahtán ovdan ahte lea stuora dárbu njulget dáruiduhttima dagahan vahágiid. Dáruiduhttin lea hávváduhttán báikegottiid ja háviid ferte dikšut. Vaikko vel leage čađahuvvon viiddes áŋgiruššan sámi kultuvrra ealáskahttimiin ja nannemiin, de lea báhcán ollu bargu. Ollugat leat giela ja kultuvrra massán, ja sii dárbbašit veahki ja doarjaga dan proseassas go áigot gávdnot, váldit ruovttoluotta dahje nannet iežaset sámi identitehta. Leat ollugat geain eai leat arenat sámi searvevuođa várás
Sámediggi bovde guvllolaš gulaskuddanproseassaide maid ulbmil lea oažžut ovdan juohke válgabiirre dárbbuid sámi fálaldagaide, ortnegiidda ja doaibmabijuide. Gulaskuddan galgá leat vuođđun go árvvoštallat man muddui ja movt iešguđet sámi válgaguovlluin lea dárbu nannet dahje rievdadit áŋgiruššama sámi gielaid ja kultuvrra ealáskahttimiin, seailluhemiin dahje nannemiin.2025 giđa dollojuvvo gulaskuddan Davveguovllu válgabiirres, ja Sámediggi áigu golmma jagi áigodagas doallat gulaskuddamiid buot válgabiirriin.
Goas boahtá Sámediggi du válgabiirii
Giđđa 2025: Davveguovllu válgabiire (čađahuvvon, geahča ášši 033/25 Duohtavuođa- ja soabadankommišuvnna raportta čuovvuleapmi regionálalaččat - Dárbu sámi fálaldagaide, ortnegiidda ja doaibmabijuide Davveguovllu válgabiirres)
Čakčat 2025: Åarjel-Saepmie veeljemegievlie
Giđđat 2026: Nuortaguovllu válgabiire
Čakčat 2026: Viestarmera válggabijrra
Čakčat 2026: Lulli-Norgga válgabiire
Giđđat 2027: Gáisi válgabiire
Giđđat 2027: Ávjovárri válgabiire
Verddet – Soabahandeaivvadeapmi
Miessemánu 2025 Sámediggi bovdii deaivvadeapmái "Verddet - Soabahandeaivvadeapmi" mii dollojuvvui Romssas, gos 300 oasseváldi ledje čoahkkanan guokte beaivvi. Ulbmilin lei ásahit deaivvadanbáikki gos sáhttá suokkardit, digaštallat ja gieđahallat Duohtavuođa- ja seanadankommišuvnna raportta.
Plána mielde galgá lágiduvvot ođđa soabadandeaivvadeapmi 2027:s. Eanet dieđut dán birra bohtet.