Boazodoallu

Boazodoallu

Boazodoallu lea guovddáš sajis sámi kultuvrras, ja dat lea okta erenoamáš ealáhus kultuvrra ektui sámi ealáhusaid gaskkas. Sámedikki boazodoallopolitihka vuođđun lea boazodoalu vuoigatvuođaid suodjaleapmi.

"Boazodoallu lea deaŧalaš ja guhkesáiggi barggaheaddji ja árvoháhkki sámi servodagas. Boazodoallu ealáhussan ja eallinvuohkin lea áidnalunddot sihke našuvnnalaččat ja riikkaidgaskasaččat. Boazodoallu váikkuha beaivválaččat sámi giela ja kultuvrra suodjaleapmái, ja árbevirolaš máhtu geavaheapmái, ovddideapmái ja gaskkusteapmái." (Sámediggedieđáhus boazodoalu birra)

Mii deattuhit maiddái ahte boazodoallu lea deaŧalaš árbevirolaš bearašvuđot ealáhus. Oktavuođa geažil sámi kultuvrii leage boazodoallu áidnalunddot ealáhus. Okta deaŧaleamos mihttomearri Sámedikki boazodoallopolitihkas lea bisuhit dan nana oktavuođa ealáhusdoaimma ja kulturdoaimma gaskka. 

Boazodoalu stuorámus hástalus lea areálaid vátnivuohta ja dat go servodaga beales ohpihii bahkkejit geavahit boazodoalu eatnamiid. Boazodoalus ferte leat areálavuođđu ceavzilvuođa ja ahtanuššama sihkkarastimii. Ráfáidahttojuvvon boraspiriid geažil gillá boazodoallu jahkásaččat ollu vahágiid. Muhtun guovlluin spedjet nu ollu ahte dat áitá boazodoalu ceavzima. Deaŧalaš lea ahte boraspirenállemihttu lea dássedeattus guovlluin gos leat bohccot, ja ahte boazodoallu oažžu buhtadusaid duohta vahágiid ovddas.