Giellaloktenbálkkašupmi

Sámediggi háliida fuomášuhttit su/sin gii vuogas vuogi mielde lea čalmmustahttán ja atnán sámegielaid iežas/-et beaivválaš doaimmas.

Vuosttaš geardde go bálkkašupmi geigejuvvui lei 2019:s. Sámedikki giellaloktenbálkkašupmi juhkkojuvvo juohke jagi priváhta olbmui/jovkui/ásahussii/organisašuvdnii mii bures ja vuohkkasit geavaha ja čalmmustahttá sámegiela(-id) beaivválaš doaimmas. Bálkkašupmi ii geigejuvvo daid jagiid go giellamovttiidahttinbálkkašupmi geigejuvvo, namalassii juohke njealját jagi.

Bálkkašupmi lea 30 000 ruvnno ja dáiddadiploma.

Almmolašvuhtii addo vejolašvuohta evttohit vuoiti bálkkašupmái oanehis čilgehusain manne vuoiti ánssáša oažžut bálkkašumi. Sámedikki ráđđeláhttut ja hálddahusbargit eai sáhte oažžut bálkkašumi. Sámediggeráđđi vállje vuoiti ja bálkkašupmi geigejuvvo muhtin doaluin mat lágiduvvojit Giellavahkus.

Árvalusat sáddejuvvojit dán čujuhussii: samediggi@samediggi.no. 2022:s lea áigemearri čakčamánu 9. beaivvi.

Ovdalaš vuoitit

2023:

Sámedikki Giellaloktenbálkkašumi 2023 vuoiti lea Emil Karlsen Omasvuonas. Son oažžu bálkkašumi iežas barggu ovddas oahppat, čalmmustahttit ja geavahit sámegiela almmolaččat.

2022:

Sámedikki Giellaloktenbálkkašumi 2022 vuoiti lea Lemet-Jon Aage, Aage Agnar Solbakk, Deanus. Aage lea olu jagiid bargan sámegiela ovdánahttimiin sihke árbevirolaš bargguid ovddideamis ja fágagirjjiid almmuhemiin.

2020:

Sámi giellaloktenbálkkašumi 2020:s vuittii Lemet Máhtte Eira Sara go lea jorgalan Minecraft eŋgelasgielas davvisámegillii.

2019:

Sámegielat snapchat-konto Snaepmie vuittii giellaloktenbálkkašumi 2019:s, go dat vuosttaš geardde geigejuvvui. Álggaheaddji Ánne Márjá Guttorm Graven válddii vuostá bálkkašumi.

Almmuhuvvon 29.08.2022 13.31

Maŋemusat rievdaduvvon 07.11.2023 12.00