Iešguđetge servodatsurggiin váilot ollu oahppan fágabargit geain lea gelbbolašvuohta sámegielain ja sámi kultuvrras. Dat guoská olles riikii, ja dovdo erenoamážit oahpahusas ja dearvvašvuođas

Váilevaš fágagelbbolašvuohta muitaluvvo váldosivvan dasa go sámegiela hálddašanguovllu suohkanat eai ollašuhte geatnegasvuođaideaset sámelága giellanjuolggadusaid ektui. Danne lea dárbu bidjat ollu searaid fágaolbmuid rekrutteremii ja oahpaheapmái go galgá ráhkadit sámi bálvalusfálaldagaid, ja vai suohkanat ja almmolaš hálddašeapmi galget nákcet čađahit geatnegasvuođaideaset máŋgga lága ektui.

Fágagelbbolašvuođa háhkan iešguđet servodatsurggiide lea hástaleaddji ja gáibida áŋgiruššama iešguđet dásiin. Eará doaibmabijut sámi studeanttaid dahje studeanttaid rekruteremis alit oahpuide sámi fágain ja dutkamii, leat sámi studeantaearit ámmátoahpuide, iešguđetlágan stipeanddat ja oahppoloanaid sihkkun.

Sámediggi oaidná dárbbu ráhkadit ollislaš rekruterenstrategiija mii fátmmasta buot servodatsurggiid. Dát bargu lea álggahuvvon.