Sámediggis lea 2019:s gulahallan lulli- ja julevsámiguovllu giellabirrasiiguin, ja lea dán proseassas oaidnán dárbbašlažžan ráhkadit eanet deaivvadansajiid pedagogaide ja giellabargiide juste dáin guovlluin.

Sámediggi oaidná ahte dárbbašuvvojit erenoamáš gealboloktenstrategiijat oahpaheddjiide sámi skuvllain ja sámegieloahpaheddjiide, earret eará sámegiel čállin- ja lohkanoahpus, guovttegielalašvuođapedagogihkas, nana oahpahusmodeallaid geavaheamis ja vugiin mat dahket ahte giellaoahpahus lihkostuvvá. Sámi duojis, máŋggakultuvrralaš áddejumis ja álgoálbmotpedagogihkas dárbbašuvvo gealbolokten. Dasto dárbbašuvvo eanet gelbbolašvuohta das mo sámegielat, sámi kultuvra ja árbediehtu sáhttet skuvlii heivehuvvot, ja mo integreret sámegielaid, sámi kultuvrra ja sámi árbedieđu luonddufágii, servodatfágii, matematihkkii ja eará fágaide, ja mo giellaguddiid geavaha oahpahusas

Sámediggi áigu lágidit giella- ja oahpahuskonferánssaid lulli- ja julevsámi guovlluin, ja leat veahkkin ásaheamen fierpmádaga giellabargiide ja pedagogaide lulli- ja julevsámi guovlluin. Dát livččii mielde sihke gelbbolašvuođa loktemin ja fágalaš fierpmádaga huksemin

Konferánssa ulbmiljoavkku cealkámušaid vuođul áigut lágidit oktasaš konferánssa lullisámi ja julevsámi pedagogaide ja giellabargiide. Vuosttaš konferánsa lea plánejuvvomin, ja galgá lágiduvvot 2020 čavčča. Konferánssa fáddán galget leat lulli- ja julevsámi ovddidanprográmmat, sámi árvvut ja filosofiija oahpahusas, digitaliseren ja oahpponeavvut, ja gievrras giellamállet.