Álbmotregisttar almmuhii 2019 čavčča vejolašvuođa registreret sámegiela geavaheami registerii.  Registreren lea eaktodáhtolaš, ja juohkehaš ferte ieš dieđihit iežas sámegielgeavaheami. Don sáhtát registreret lulli, - julev ja davvisámegiela, ja sáhtát maiddái registreret eanet sámegielaid maid máhtát.

Almmuheapmi oaččui olu fuomášumi medias ja sosiála medias, ja oallugat registrereje vuosttaš vahkkuid maŋŋel almmuheami.

Sámegielaid registrerema vuođul galgá dahkkot statistihkka sámegiela geavaheamis. Odne ii gávdno almmolaš dahje eará ollislaš statistihkka sámegiela geavaheamis.  Registera ja statistihka vuođul galgá sáhttit guorrat giellaovddideami áiggiid čađa, ja dan bokte hábmet giellapolitihkalaš doaimmaid.

Huksen dihte registera lea dárbu oažžut eanet sámegielagiid registreret iežaset giellageavaheami. Vai oažžu fuomášumi dasa, de lea dárbu cegget márkanastinkampánjja. Dakkár kampánjjas lea dehálaš deattuhit ja fuomášuhttit dárbbu giellaregisttarii. Buorre giellastatistihkka livččii ávkkálaš veahkkeneavvu boahttevaš giellabálvalusaid ovddideamis.