Giellaguovllu ulbmil lea ásahit ortnega mii lea buorebut heivehuvvon suohkaniid iešguđetlágan gielladillái. Ođđa giellaguovlu šaddá eanet heivehuvvon, ja leat evttohan juohkit dan iešguđetlágan suohkankategoriijaide.

Sámedikki dievasčoahkkin meannudii giellalávdegotti evttohusa ođđa giellaguovllu birra áššis 053/18. Sámedikki dievasčoahkkin evttoha ahte giellaguovllu suohkanat juhkkojuvvojit viđa iešguđetlágán kategoriijii; sámi resursasuohkanat, sámi ovddidansuohkanat, sámi ealáskahttinsuohkanat, sámi gávpotsuohkanat ja vejolaš sámi giellasuohkanat. Okta váikkuhangaskaomiin dasa ahte buoremusat láhčit diliid nu ahte giellaguovloortnet heive iešguđet suohkana duohta dillái, lea iešguđet suohkankategoriijaid bokte. Ođđa sámi giellaguovlu váikkuha sámegiela hálddašanguovllu suohkaniid dálá doarjjaortnega, ja danne lea dárbu lagas gulahallamii suohkaniiguin doarjjaortnega rievdadusaid birra.

Sámi giellaguovllu suohkaniid ja fylkkasuohkaniid doarjjamodeallaid hábmenbargu lea álggahuvvon, gč. Sámedikki dievasčoahkkinmearrádusa áššis 053/18 Sámi giellaguovlu. Ođđa doarjjamálle lea fáddán jahkásaš suohkansemináras. Suohkaniiguin ja fylkkasuohkaniiguin lea dehálaš gulahallat ja juohkit daidda dieđuid ođđa doarjjamálle barggu birra, ja suohkanseminárat leat lunddolaš arenat dakkár gulahallamii.