Oassin girjjálašvuođa áŋgiruššamis leat Sámedikkis strategiijat dan ektui movt oččodit eanet girječálliid, oažžut almmuhuvvot eanet sámegielat girjjiid ja oažžut eambbogiid lohkat sámegielat girjjiid.

Sámediggi álggahii 2015:s girječállinprošeavtta ovttasráđiid Sámi dáiddárráđiin (SDR) ja Sámi girječállinservviin (SGS). Sámediggi ruhtada prošeavtta. Sámi Dáiddárráđis (SDR) lea hálddahuslaš ovddasvástádus prošeavttas, ja Sámi Girječálliid Searvvis (SGS) lea ges fágalaš ovddasvástádus prošeavttas.

Prošeavtta mihttomearrin lea movttiidahttit almmuhit eanet čáppagirjjálašvuođagirjjiid dainna ulbmilin ahte rekrutteret čálliid geat čállet sámegillii. Prošeakta galgá vuosttažettiin ovddidit čállindoaimma, ja loktet boahttevaš čálliid girjjálašvuođagealbbu. Prošeavtta oasseváldit galget ovddidit iežaset girjjálaš ja dáiddalaš diehtomielalašvuođa, ja háhkat čállifágalaš gelbbolašvuođa.

Dán rádjai lea dat lihkostuvvan bures. Vuosttaš Čális fal! – girječálli oahppu čađahuvvui 2015 -2017. Oahpus ledje 10 oahppi, ja prošeavtta boađusin almmustahttojuvvui In mun goit antologiija Fredrikstens Festning:as Tråante 2017 ávvudeami oktavuođas.

Sámediggi joatká viidáset prošeavtta 2020:s. Čális fal! 3 biddjo johtui 2020 borgemánu ja bistá 2022 rádjai.

Eanet dieđut Čális fal! - girječállioahpu birra